Viola Beach բրիտանական խմբի երաժիշտները զոհվել են Շվեդիայում ճանապարհատրանսպորտային պատահարի հետևանքով: Ողբերգությունը տեղի է ունեցել փետրվարի 14-ին Ստոկհոլմի արվարձանում: Ավտոմեքենան, որում եղել են խմբի մասնակիցները և մենեջերը, կամրջից ընկել է ջրանցքը, հայտնում է TASS-ը:
Ականատեսների խոսքով` մեքենան մեծ արագությամբ թռել է պատնեշի վրայով և ընդհարվելով մեկ այլ ավտոմեքենայի՝ ընկել է ներքև: Ոչ ոքի չի հաջողվել փրկել:
Հաղորդվում է, որ դեպքը տեղի է ունեցել այն ժամանակ, երբ կամրջի մի մասը բարձրացված է եղել` ջրանցքով նավ թողնելու համար:
Խումբը Where is the Music? փառատոնին մասնակցելուց հետո վերադառնում էր Անգլիա: 2015 թվականին երաժիշտները ձայնագրել են դեբյուտային Swings & Waterslides սինգլը, իսկ 2016 թվականին պետք է կատարեին իրենց առաջին համերգային շրջագայությունը:
