Georgia Online-ի փոխանցմամբ՝ Վրաստանի էներգետիկայի նախարար Կախա Կալաձեն կարծում է, որ անհրաժեշտ է արագացնել էներգոնախագծերը Վրաստանում։ Կալաձեն «Վրաստանի էներգետիկան» գրքի շնորհանդեսի ժամանակ հայտարարել է, որ երկիրն ունի պոտենցիալ՝ դառնալու համար էլեկտրաէներգիա արտահանող։
Նախարարի խոսքերով՝ վերջին 3 տարում Վրաստանում իրականացվել են բազմաթիվ կարևոր նախագծեր, ինչպես նաև պլանավորված են ապագային միտված նախագծեր. «Այդ ամենն իրականացվում է մեկ պարզ պատճառով, որպեսզի մենք հնարավորինս արագ Վրաստանը վերածենք էլեկտրաէներգիայի հարցում անկախ երկրի, որպեսզի մենք կախված չլինենք հարևան երկրներից, ինչպես որ այսօր է։
Ձմեռային ժամանակաշրջանում, երբ աճում է էլեկտրաէներգիայի սպառումը, մենք հարկադրված ենք այն ստանալ հարևան երկրներից»։
Կալաձեն հավելել է, որ անհրաժեշտ է անել ամեն բան և հնարավորինս արագ, որպեսզի Վրաստանն ունենա ներքին սպառման համար բավականաչափ էլեկտրաէներգիա.
«Մենք նաև հնարավորություն ունենք դառնալու արտահանող երկիր։ Մենք կարող ենք էլեկտրաէներգիա մատակարարել Թուրքիային, իսկ նրա միջոցով՝ եվրոպական երկրներին»։
