Աշխատանքային պայմանների բարելավում, երաշխիքներ և հեռացված 305 գործընկերների վերադարձ՝ սրանք են Թուրքիայի խոշորագույն ավիափոխադրող Turkish Airlines-ի ծառայողների պահանջները: Նրանք կարծում են, որ իրենց գործընկերները հեռացվել են անհիմն: Ինչպես հայտարարել են այսօր քաղավիացիայի աշխատողների արհմիությունում, ավիաընկերության աշխատակիցները սպասել են իրենց պահանջների կատարման վերաբերյալ ավիաընկերության ղեկավարության վերջին որոշմանը, սակայն գիշերը ստիպված են եղել գործադուլ սկսել: Այս մասին հայտնում է ITAR-TASS-ը:
Ավիաընկերության ղեկավարության հաղորդմամբ՝ գործադուլի մեկնարկի պահից ծրագրված ավելի քան 80 չվերթներից ոչ մեկը չեղյալ չի հայտարարվել կամ չի հետաձգվել: Հնարավոր է, որ ծանրաբեռնվածության դեպքում խնդիրներ առաջանան չվերթների սպասարկման հետ:
Ընկերության աշխատակիցներն իրենց պահանջները ավիաընկերությանն էին ներկայացրել ավելի քան մեկ տարի առաջ: Համատեղ քննարկումները արդյունք չեն տվել:
Ավիաընկերության աշխատակիցների նախորդ գործադուլը տեղի էր ունեցել 22 տարի առաջ և տևել 38 օր:
