«ՀայՌուսգազարդը» երեկ գազը թանկացնելու հայտ է ներկայացրել Հանրային ծառայությունները կարգավորող հանձնաժողով: Նա առաջարկել է բարձրացնել և՛ բնակիչներին (ամսական մինչև 10 հազար խորանարդ մետր գազ սպառողներին), և՛ գործարարներին (ամսական 10 հազար խորանարդ մետրից ավելի շատ գազ սպառողներին) վաճառվող գազի գինը:
Բնակիչների դեպքում գործող 132 դրամ/խորանարդ մետրի փոխարեն առաջարկվել է 221 դրամ/խորանարդ մետր սակագին: Այսինքն` խոսքը աննախադեպ` ավելի քան 67% թանկացման մասին է: Օրինակ` եթե դուք ձմռան ամիսներին գազի համար վճարում էիք, ասենք, ամսական 35 հազար դրամ, ապա «ՀայՌուսգազարդի» առաջարկած գնի հաստատման դեպքում կվճարեք մոտ 59 հազար դրամ` 24 հազարով ավելի շատ: Մոտավորապես նույն չափով էլ թանկացել է գործարարներին վաճառվող կապույտ վառելիքի սակագինը: Մոտ 243 դրամ/խորանարդ մետրի փոխարեն առաջարկում է 392 դրամ/խորանարդ մետր սակագին, այսինքն` մոտ 62 տոկոսով ավելի: Գործարարների դեպքում սակագինը ճշգրտվում է նաև փոխարժեքով, այնպես որ` «ՀայՌուսգազարդը» դրամի արժեզրկումից վնասներ չկրի:
«ՀայՌուսգազարդի» ներկայացրած հայտը դեռևս չի նշանակում, իհարկե, թե գազը անպայման հենց այդքան էլ կթանկանա: Հանձնաժողովը, առաջիկա 90 օրերի ընթացքում, ամենայն հավանականությամբ, «լուրջ-լուրջ» կուսումնասիրի հայտն ու կկանգնի, ամենայն հավանականությամբ, 45-50 տոկոս թանկացման վրա: Բայց այստեղ կարևոր է նաև այն, թե գազի ներմուծման ի՞նչ գին է գրել(ու) «ՀայՌուսգազարդը»` Հանրային ծառայությունները կարգավորող հանձնաժողով (ՀԾԿՀ) ներկայացրած իր հայտում: Իսկ դա ամենակարևոր հարցն է, քանի որ և՛ Հայաստանի սահմանի վրա գազի գին գրողը, և՛ հայաստանցի վերջնական սպառողին գազ վաճառողը նույն «Գազպրոմն» է: Նա կարող է 360 դոլար/1000 խոր.մետր գնով հայաստանցիներիս վաճառող գազի սահմանի գինը գրել 180 դոլար/1000 խոր.մետր, բայց կարող է գրել նաև 300 դոլար/1000 խոր.մետր: Տարբերությունն այն է, որ առաջին դեպքում մեր իշխանավորները սկսում են պատմել Գյուլնազ տատի հեքիաթները «էժան ռուսական գազի» մասին, իսկ երկրորդ դեպքում նման բան անել պարզապես չեն կարող: Որովհետև, ինչպես մոտ 2 տարի առաջ ցույց էր տրվել «Առաջին լրատվական» կայքում, 132 դրամ/խոր.մետր սակագինը Հայաստանի վերջնական սպառողների համար շատ չի տարբերվում եվրոպացիներին վաճառվող վերջնական սպառման գնից:
Այժմ իշխանություններն ու «ՀայՌուսգազարդը» մտմտում են, թե ինչ գին ներկայացնեն որպես սահմանի վրայի գին, որպեսզի առավելագույնս «ուտվի»: Այսօր, ամենայն հավանականությամբ, պաշտոնական հայտարարությամբ կասվի, թե նախկինում հայտարարված 180 դոլար/հազար խոր.մետրի փոխարեն այժմ ինչքանն է համարվելու «սահմանի գին»: Մի բան ակնհայտ է` մենք վերջին 3 տարիներին Ռուսաստանից, ավելի ճիշտ` «Գազպրոմից» (կամ որ նույնն է` «ՀայՌուսգազարդից») շուկայականից էժան գազ չենք ստացել, և եթե ՀԾԿՀ-ն հաստատի «ՀայՌուսգազարդի» առաջարկած սակագինը, ապա կդառնանք աշխարհում գազի համար ամենաթանկ գին վճարող սպառողներից մեկը:
