Ռուսական RIA Novosti լրատվական գործակալության փոխանցմամբ՝ ՆԱՏՕ-ի անդամ երկրների պաշտպանության նախարարները փետրվարի 10-11-ին Բրյուսելում քննարկելու են Թուրքիայի ու Գերմանիայի այն հայտարարությունները, որոնք առնչվում են Թուրքիայի սահմաններին, այդ թվում՝ նաև ծովային, մոնիտորինգ իրականացնելու մտադրության վերաբերյալ առաջարկին՝ կապված ապօրինի ներգաղթի դեմ պայքարի հետ։
Այդ մասին Բրյուսելում լրագրողների հետ զրույցում հայտարարել է ՆԱՏՕ-ի գլխավոր քարտուղար Յենս Սթոլթենբերգը. «Մենք կլսենք Թուրքիայի պաշտպանության նախարարին։ ՆԱՏՕ-ի երկրները կկիսվեն իրենց գնահատականներով, իսկ հետ կքննարկենք, թե ինչպես պետք է գործենք»։
Նախօրեին Թուրքիայի վարչապետ Ահմեթ Դավութօղլուն Գերմանիայի կանցլեր Անգելա Մերկելի հետ համատեղ մամուլի ասուլիսի ժամանակ հայտարարել էր, որ իրենք ձգտելու են ներգաղթյալների դեմ պայքարի հարցն ընդգրկել ՆԱՏՕ-ի օրակարգում։
