Սիրիայի հարցով միջազգային համաժողովի կազմակերպումը, որի անցկացումը նշանակված է հունիսի սկզբին, ընթանում է «մեծ դժվարությամբ»՝ հայտարարել է Ֆրանսիայի արտգործնախարար Լորան Ֆաբիուսը:
ԱՄՆ-ը և Ռուսաստանը հանդես էին եկել մայիսին վերջին Սիրիայի հարցով միջազգային համաժողով անցկացնելու նախաձեռնությամբ: ԵՄ մի շարք երկրներ հայտնել էին իրենց աջակցությունը այդ հարցում: Երկուշաբթի ԱՄՆ Պետդեպի ներկայացուցիչը հայտարարել էր, որ միջազգային համաժողովը կարող է անցկացվել հունիսի սկզբին, սակայն մասնակիցները դեռևս հայտնի չեն:
«Ակնհայտ է, որ Ֆրանսիան կողմ է երկրորդ ժնևյան համաժողովին, միևնույն ժամանակ դա շատ բարդ է… սակայն Ֆրանսիան անում է իր գործը»,- ասել է Ֆաբիուսը RTL ռադիոկայանի եթերում: Նա հավելել է, որ Ֆրանսիան մտադիր է շարունակել ջանքերը համաժողովի կազմակերպման ուղղությամբ՝ մինչև մայիսի վերջ: Ֆաբիուսի խոսքով՝ խոշոր համաժողովին կնախորդեն մի շարք միջանկյալ հանդիպումներ, որոնցից մեկը հնարավոր է՝ անցկացվի Հորդանանում հաջորդ շաբաթվա վերջին, իսկ մյուսը՝ Փարիզում:
«Առկա է որոշակի անորոշություն: Մենք կոչ չենք անում Ասադին լքել իր պաշտոնը մինչև համաժողովի անցկացումը… Մենք չենք ցանկանում, որպեսզի անցումային կառավարությունն իր վրա վերցնի Բաշար Ասադի լիազորությունները, երբ նա հեռանա»,- ասել է Ֆաբիուսը:
Ֆաբիուսի խոսքով՝ համաժողովի կազմակերպման ամենադժվարին պահերից մեկը սիրիական կողմը ներկայացնող անձանց որոնումն է՝ ինչպես ռեժիմի կողմնակիցների, այնպես էլ ընդդիմության շրջանում: «Դա հեշտ չէ, պետք է գտնել ընդդիմության ու ռեժիմի ներկայացուցիչների, որոնց ձեռքերն արյունոտված չեն»,- հավելել է նախարարը:
