Նավթի գնի վերաբերյալ փորձագիտական կարծիքները կարող են տարբերվել, սակայն ապագա միտումների մասին առավել շատ խոսում է այն, որ ներդրումային մենեջերները հիմա ավելի հակված են հավատալ նավթին, քան երբևէ: Այս մասին գրում է Bloomberg Business-ը:
Նավթի շուկայում միջոցներ ներդրած ձեռնարկատերերի ընդհանուր թիվը հասել է առավելագույն մակարդակի այն ժամանակներից, երբ ԱՄՆ Ապրանքային ֆյուչերսների առևտրի հարցերով հանձնաժողովը 2006 թ. սկսել է տվյալներ հավաքել:
«Միաժամաակ, շուկայում կա 2 կողմ՝ հակառակ տեսանկյուններով: Մենք պայքար ենք նկատում նրանց միջև, ովքեր կարծում են, որ հատակն արդեն հասել է, և նրանց, ովքեր կարծում են, որ էլի էժանացում կլինի»,- նշում է էներգետիկ ոլորտի վրա կենտրոնացած Again Capital LLC հեջ-հիմնադրամում գործընկեր Ջոն Քիլդաֆը:
Վերջերս դիտվում է արտահանողների ուժեղացված ակտիվություն շուկայում իրավիճակի կայունացման ուղղությամբ: ՕՊԵԿ-ի 6 անդամ երկիր ու ևս 2 անկախ արտադրող պատրաստ են մասնակցել արտահերթ նիստին, որի ընթացքում կքննարկվի նավթի արդյունահանման համաձայնեցված կրճատումը: Այս մասին հայտարարել է Վենեսուելայի նավթի նախարար Էուլոխիո դել Պինոն Թեհրանում իրանցի գործընկեր Բիջան Զանգանեի հետ խորհրդակցություններից հետո:
«Համատեղ ջանքերը, որոնք կարող են բերել ՕՊԵԿ-ի երկրների և նավթի այլ արտահանողների միջև համաձայնագրի, ավելացրել են լավատեսությունը և հստակ հույս են տվել, որ գների աճը սպասել չի տա»,- նշում է Վինչեսթերում ռազմավարական էներգետիկ և տնտեսական ուսումնասիրությունների նախագահ Մայքլ Լինչը:
