Փետրվարի 14-ին Դիլիջանի քաղաքապետի պաշտոնի համար կմրցեն ներկա քաղաքապետ Արմեն Սանթրոսյանն ու նախկին քաղաքապետ, անկուսակցական Ժորա Սահաբալյանը: Արմեն Սանթրոսյանին առաջադրել է ՀՀԿ-ն: Դեռ կոալիցիա չկազմած՝ ՀՅԴ-ի Դիլիջանի կառույցը քաղաքական որոշում է կայացրել, որ սատարելու է Սանթրոսյանի թեկնածությունը: Վերջինս Դիլիջանի քաղաքապետն է 2005 թվականից:
Դիլիջանի նախկին քաղաքապետ Ժորա Սահաբալյանին սատարելու մասին դեռ ոչ մի քաղաքական որոշում չի եղել: Նա նախկինում հանրապետական է եղել, սակայն 2012-ին լքել է ՀՀԿ-ի շարքերն ու միացել ԲՀԿ-ին: Այժմ էլ անկուսակցական է:
Ընդհանուր առմամբ, մեզ հետ զրույցում դիլիջանցիներն ասացին, որ քաղաքում այս տարիների ընթացքում էական բան չի փոխվել ու իրենք անտարբեր են քաղաքապետի ընտրության հանդեպ, սակայն ավագանիները, որոնք իրենց նախկինում չէին էլ բարևում, այժմ ոչ միայն բարևում, այլև խնդրում են ձայն տալ:
«Առաջին լրատվական»-ը այս քռթիվ մի քանի հարց ուղղեց Դիլիջանի գործող քաղաքապետ Արմեն Սանթրոսյանին:
– Պարոն Սանթրոսյան, արդեն 10 տարուց ավելի քաղաքապետ եք, ինչո՞ւ եք ուզում կրկին վերընտրվել, դիլիջանցիներն ասում են, որ քաղաքում էական բան չի փոխվել:
– Ես առաջադրվել եմ Հանրապետականի կողմից: Մենք ունենք դեռևս շատ կիսատ աշխատանքներ, որ պետք է հասցնենք ավարտին: Իսկ ինչ մնում է, որ դիլիջանցիները դժգոհում են, ես 100 տոկոսով չեմ ընտրվել, 70 տոկոսով եմ ընտրվել, երևի թե 30 տոկոսի հետ եք դուք առիթ ունեցել խոսելու: Եթե 10 տարի առաջ եղել եք Դիլիջանում ու հիմա գաք տեսնեք, կտեսնեք, թե ինչքան փոփոխություն կա: Շատ խոշոր ծրագրեր ենք արել քաղաքում, շատ խոշոր:
– Իսկ հնարավոր համարո՞ւմ եք, որ այս ընտրություններում չընտրվեք:
– Չէ՛: Հնարավոր եթե համարեի, ես իմ թեկնածությունը չէի դնի:
– Ասել է թե՝ համոզված եք, որ Դուք եք անցնելու, քանի որ ՀՀԿ-ն է Ձեզ սատարում:
– Ոչ միայն: Նաև կատարած աշխատանքների և ժողովրդի հետ ամենօրյա շփման, ամենօրյա հոգսերով աշխատելու արդյունքում:
– Որոշ դիլիջանցիներ ասում են, որ Ձեր մրցակցի՝ նախկին քաղաքապետի աշխատանքից ավելի գոհ են, եթե այնուամենայնիվ այս անգամ դիլիջանցիները նրան ընտրեն, պատրաստվո՞ւմ եք զիջել, թե՞ ամեն գնով ընտրվելու եք՝ լցոնումներ և այլն, ինչպես սովորաբար ՀՀԿ-ն է անում:
– Դիլիջան քաղաքում որևիցե անգամ ընտրախախտում չի եղել: Իսկ ինչ վերաբերում է լցոնումներին, սա նաև ավագանու ընտրություն է, 32 թեկնածու կա, և բոլորն էլ ունենալու են իրենց վստահված անձինք: Եթե որևէ մի հանձնաժողովի անդամ կմտածի, որ այդքան վստահված անձի ու դիտորդների ներկայությամբ կարող է նման բան անել, չեմ կարծում:
– Ուզում եք ասել՝ ՀՀԿ-ն այս անգամ չի՞ դիմի իրեն հայտնի մեթոդներին:
– ՀՀԿ-ն ոչ մի անգամ որևիցե մեթոդի չի դիմել:
– Այնուամենայնիվ, եթե Ձեր մրցակիցը հաղթի, Դուք կշնորհավորե՞ք նրան:
– Իհարկե: Արժանի մրցակից եմ համարում՝ անկախ նրանից, որ արդեն 4-րդ անգամ ենք պայքարում իրար դեմ:
– Դիլիջանցիները նաև ասում են, որ Դիլիջանն այսօր գրեթե «մեռած քաղաք» է, հնարավոր չէ համեմատել Ծաղկաձորի հետ:
– Ես էդպես չէի ասի: Ծաղկաձորն ավելի շատ ձմեռային կուրորտ է, իսկ մնացած սեզոններին Դիլիջանում մենք հասել ենք նրան, որ տարեկան 300 հազարին մոտ հանգստացողներ ու տուրիստներ ենք ունենում:
