Գիտնականները պարզել են, որ գորշ արջերի աղիքային միկրոֆլորայի սեզոնային փոփոխությունները նրանց օգնում են հաղթահարել ձմեռելու հետ կապված դժվարությունները՝ գրում է korrespondent.net-ը:
Գիտնականները ուսումնասիրել են 16 արջերի արտաթորանքը և դրանում հայտնաբերել մանրէներ, որոնք պատասխանատու են ամռանը ճարպի «աճի» և ձմռանը դրա «այրման» համար: Հետազոտությունների առաջատար հեղինակ Ֆրեդրիկ Բեքհեդը՝ Շվեդիայի Գետեբորգի համալսարանից, հայտարարել է, որ գորշ արջերի աղիքային միկրոֆլորայի սեզոնային փոփոխությունները անսպասելի չեն գիտնականների համար, սակայն հենց այս ուսումնասիրությունների ժամանակ են գիտնականները առաջին անգամ հասկացել, թե ինչ դեր ունեն մանրէները քնած ժամանակ այդ կենդանիների օրգանիզմում կատարվող նյութափոխանակության մեջ:
Գիտնականները նաև արջերի արտաթորանքից վերցված մանրէները ներարկել են մկներին: Արդյունքում մկների այն խումբը, որին ներարկել են «ամառային» արտաթորանքի մանրէները, սկսել է ավելի արագ գիրանալ, քան նրանք, որոնց ներարկել են «ձմեռային» արտաթորանքի մանրէները:
Մասնագետների համոզմամբ՝ ստացված տեղեկությունները կնպաստեն սնվելու հետ կապված խնդիրներով տառապող հիվանդներին, օրինակ՝ անորեքսիայով տառապողներին:
