Տևական ժամանակ քննարկումներից հետո ԲՀԿ-ն վերջապես կողմնորոշվել է, որ Երևանի ավագանու ընտրություններում ձեռք բերված 17 մանդատները հետ չեն վերադարձնելու: Այս մասին ԳԱԼԱ-ին ասել է ԲՀԿ խմբակցության ղեկավար Նաիրա Զոհրաբյանը:
«Որպես այդպիսին՝ խորքային քննարկումներ չեն եղել: Եղել է տեսակետ, որ պետք չէ վերցնել մանդատները, բայց գերակշռող էր այն տեսակետը, որ մենք բարոյական պարտավորություն ունենք այն հարյուր հազար երևանցիների առջև, ովքեր իրենց վստահության քվեն տվել են ԲՀԿ-ին: Որոշվել է վերցնել մանդատները և փորձել Երևանի ավագանիում բարձրացնել այն հարցերը, որոնք այսօր հրատապ կանգնած են Երևանի և երևանցու առջև:
Հստակ կա Գագիկ Ծառուկյանի հանձնարարականը բոլոր նրանց, ովքեր ներկայացված կլինեն Երևանի ավագանիում, որ իրենց հիմնական աշխատատեղը ոչ թե իրենց փափուկ հանգիստ, կոմֆորտ աշխատասենյակներն են լինելու քաղաքապետարանում, այլ` Երևանի փողոցներում և բակերում, պետք է շարունակեն շփվել երևանցու հետ և բոլոր խնդիրները, որ կան` բարձրացնել: Մենք այս ընթացքում տեսանք, թե ինչ լրջագույն խնդիրներ կային քաղաքում, հատկապես` Կենտրոնից դուրս գտնվող թաղերում և բակերում: Դրանք բոլորը պետք է փորձել բարձրացնել Երևանի ավագանիում: Առաջին երեք տեղերը ինքնաբացարկ կներկայացնեն, այսօր` օրվա վերջում, պարզ կլինի բոլոր 17-ի անունը»:
Լուսանկարը` PanARMENIAN Photo-ի
