Ինչպես ավելի վաղ տեղեկացրել էինք, մայիսի 3-ին «Մալիբու» սրճարանի հարևանությամբ տեղի է ունեցել ծեծկռտուք գործարար Կարեն Շահմուրադյանի և ՀՀ դիզայներների միության փոխնախագահ Ռուբեն Թոփալյանի միջև: Ռուբեն Թոփալյանը ստացել էր քթի կոտրվածք, ուղեղի ցնցում, այտի շրջանում պատռվածք:
Կարեն Շահմուրադյանը նախաքննության փուլում որևէ մեկնաբանություն չի ուզում տալ, սակայն «Ժողովուրդ» օրաթերթին տված հարցազրույցում նա նշել էր, որ ինքն ընդամենը 33 տարեկան է, այլ ոչ 50 տարեկան ինչ-որ օլիգարխ, որը թիկնապահներով է շրջապատված ու ինչ-որ հարցեր է լուծում: Նաև ասել էր, որ ինքն աշխատում է օրենքի շրջանակներում:
«Այդ մարդը ինձնից պայմանագրով գումար է վերցրել, որ աշխատի, բայց չի աշխատում: Միշտ հավատում էի, սակայն այս երկու ամիսների ընթացքում համբերության բաժակս լցվեց, և դիմեցի դատարան: Նա էլ, հասկանալով գլխի գալիքը, ինձ պրովոկացիայի ենթարկեց: Այդ օրը մի քանի անգամ հարվածեց, որ իմ կողմից մի հարված ստանա ու վազի ոստիկանություն: Ես ոչինչ չունեմ ավելացնելու, մնացածը թող պարզի քննությունը»,-ասել էր նա:
«Առաջին լրատվական»-ի հետ զրույցում Ռուբեն Թոփալյանը, անդրադառնալով Կարեն Շահմուրադյանի մեկնաբանությանը, նշեց, որ բնականաբար՝ ինքը Կարեն Շահմուրադյանին չի հարվածել, որ Կարեն Շահմուրադյանն ինքն է խփել. «Այդ մասին չեմ էլ ուզում խոսել, և պարզ է, որ նա այդպես պետք է ասի»,- ասաց նա և հավելեց՝ քանի որ իր աշխատանքներն արդեն ավարտված էին, և նա պետք է վճարում կատարեր, այդ վճարումը չկատարելու համար փորձել է իրեն դատի տալ:
«Այնպես որ՝ փորձում է արդարացնել իր արածը, փորձում է ինչ-որ ձևով արդարանալ, և դա է միակ խնդիրը, և ես սպասում էի, որ նման ինչ-որ բան պետք է ասեր, զարմանալի ոչինչ չկա»,- ասաց դիզայները:
Կարեն Շահմուրադյանը Ռուբեն Թոփալյանին դատի է տվել աշխատանքի ոչ պատշաճ կատարման համար. «Ինքը որոշել է, որ ես ուշացրել եմ որոշակի ժամկետ, ուշացման համար դատի է տվել, բայց որևէ ուշացում չի եղել: Իսկ եթե ինչ-որ ուշացում եղել է, ապա եղել է միայն իր կողմից»,- ասաց նա՝ հավելելով, որ սա առաջին դեպքը չէ:
Գործի առթիվ կատարվում է նախաքննություն: Երկուշաբթի օրը պատրաստ կլինի նրա դատաբժշկական եզրակացությունը:
Ռուբեն Թոփալյանը ուզում է հավատալ, որ պատշաճ քննություն կիրականացվի: Այս պահին նա իրեն շարունակում է վատ զգալ, ունի գլխապտույտ, սրտխառնոց և այլն:
Ի դեպ, Շահմուրադյաններին են պատկանում «ԱվտոՎԱԶ»-ի դիլլեր «Արմենիա-Լադա», «Կարկոմավտո» ընկերությունները:
