Այս տարի «Եվրատեսիլ» ամենամյա մրցույթին կմասնակցի 39 երկիր: Մեկ տարվա ընդմիջումից հետո Հայաստանը կմասնակցի մրցույթին, իսկ Բոսնիա և Հերցոգովինան, Պորտուգալիան, Սլովակիան ու Թուրքիան չեն մասնակցի: Բոսնիա և Հերցոգովինայի՝ մրցույթին չմասնակցելու պատճառներից մեկն էլ այս երկրից հեռարձակման համար գումարի հարցը չլուծվելն է:
Ինչ վերաբերում է Շվեդիային, ապա այն «Եվրատեսիլ» ամենամյա մրցույթում մեծ դեր ունի ոչ միայն նրա համար, որ այստեղից են դուրս գալիս մրցույթի հաղթողներից շատերը: 20-50 տոկոս լուրջ երգերի ձայնագրման աշխատանքները կատարվում են հենց շվեդական ստուդիաներում: Շվեդական ծագում ունի նաև «Աբբան»: Իրականում շվեդական երաժշտական արտադրության համար «Եվրատեսիլը» հսկայական կոմերցիոն հաջողություն է ապահովում:
Չնայած բոլոր դրական հանգամանքներին՝ «Եվրատեսիլին» ակնհայտորեն խանգարում է քաղաքականությունը: Օրինակ, 2009-ին Մոսկվայում թույլ չտվեցին Վրաստանի մասնակցությունը: Այս երկիրը ներկայացնում էր We don’t wanna put in երգը: Չմասնակցեցին նաև Մոնակոն և Ավստրիան, քանի որ նրանց կարծիքով՝ գերակշռում էր արևելաեվրոպական քվեարկությունը: Եղան մի շարք երկրներ, որոնք Իսրայելի մասնակցության պատճառով չմասնակցեցին: Մի տարի առաջ Հայաստանը չգնաց Բաքու: Այս տարի «Եվրատեսիլում» մասնակցության համար չկարողացան Անդորրայում, Բոսնիա և Հերցոգովինայում հեռարձակումն ապահովելու համար գումար հավաքել: Տարբեր պատճառներով Մալմո չեն գնալու լեհերը, թուրքերը, պորտուգալացիներն ու չեխերը:
«Եվրատեսիլում» կա նաև մի ավանդույթ՝ հաջողություն ունեցող երգի հեղինակը հեղինակում է մեկ այլ երգ: Շվեդ Թոմաս Գուստաֆսոնը, ում գրած երգն անցյալ տարի հաղթող ճանաչվեց, այս տարի Վրաստանի ներկայացուցչի համար է խոսքեր գրել: Նրա հեղինակած կոմպոզիցիոն դուետ Waterfall երգը կատարում են Սոֆո Գելովանին և Նադիկո Տատիշվիլին: Նշենք, որ մինչև վրաց-ռուսական պատերազմը Սոֆո Գելովանին մեկ անգամ չէ, որ հաղթել է ռուսական մրցույթներում: Մեկ այլ՝ Սան Մարինոյի ներկայացուցչի երգը պատվիրվել է գերմանացի Ռալֆ Զիգելին՝ Dschinghis Khan խմբի հիմնադրին և եվրոպական պատմության մեջ ամենաշատ երգեր գրած հեղինակին: Սա կլինի նրա 22-րդ մրցույթը: Հետաքրքրիր է, որ նա անցյալ տարի ևս Սան Մարինոյի ներկայացուցչի համար երգ է գրել, և հենց նույն երգչուհու՝ Վալենտինա Մոնտենայի համար: Երգչուհին անցյալ տարի զբաղեցրել է 14-րդ հորիզոնականը:
Հայաստանը ներկայացնող «Դորիանս» խմբի Lonely Planet երգի համահեղինակն է լեգենդար Black Sabbath խմբի կիթառահար Թոնի Այոմին:
William Hill բուքմեյքերական գրասենյակի տվյալներով՝ «Եվրատեսիլ 2013»-ում Դանիայի ներկայացուցիչ Էմելի դե Ֆորեսթն է հաղթելու: Նա հանդես է գալու Only Teardrops երգով, որն իր մեջ ունի ֆոլկլորային մոտիվներ և պարզ էստրադային մեղեդի: Ինչպես միշտ, Ուկրաինայի շանսերն են բարձր գնահատվում: Այս երկիրը ներկայացնող Զլատա Օգնևիչը մոտեցել է դանիացուն՝ իր Gravity երգով: Երրորդ տեղում Նորվեգիան է՝ I Feed You My Love երգով, որը կատարում է Մարգարետ Բերգերը: Սակայն սրանք միայն էլեկտրոնային քվեարկությամբ ամփոփված արդյունքներ են, բոլոր շանսերը կարող են հօդս ցնդել համերգից հետո: Այդ շանսերը կարող է պակասեցնել հատկապես Հունաստանը, որն այս տարի ներկայացնում է Koza Mostra խումբը՝ բալկանյան ավանդույթներով ներկայացված Alcohol Is Free երգով:
Հավելենք, որ «Դորիանսը» Մալմոյում ելույթ կունենա մայիսի 16-ին՝ Lonely planet երգով: Երաժշտության համահեղինակն է Թոնի Այոմին, խոսքերի հեղինակը՝ Վարդան Զադոյանը:
