Երուսաղեմում իսրայելական ոստիկանությունը հետ է մղել հարյուրավոր օրթոդոքս հրեաների հարձակումը, որոնք փակել էին Լացի պատի մոտ աղոթել ցանկացող մի խումբ կանանց ճանապարհը, հայտնում է BBC-ի ռուսական ծառայությունը: Լացի պատը հուդայականները համարում են սուրբ:
Ոստիկանության ներկայացուցչի խոսքերով՝ կալանավորվել է 3 տղամարդ, որոնք վիրավորական արտահայտություններ են թույլ տվել իրենց ու շշեր, աթոռներ ու այլ իրեր նետել կանանց ու ոստիկանների կողմը։
Հրեա կանանց վաղուց է թույլատրված այցելել Լացի պատ: Ներկայում դատարանը որոշել է նրանց թույլ տալ կրել ավանդական աղոթքի գլխաշորեր (արգելված էր 2003–ից), հետևաբար՝ կարդալ աղոթքներ պատի մոտ:
Որոշ օրթոդոքս հրեաներ կարծում են, որ գլխաշորերն ու կրոնական մյուս բոլոր իրերն իրավունք ունեն կրել միայն տղամարդիկ:
Ավելի վաղ, կանանց, որոնք փորձում էին աղոթել Լացի պատի մոտ, կալանավորում էին:
