Վաշինգտոնը և նրա դաշնակիցները կարող են մի քանի շաբաթ Լիբիայում ռազմական արշավ սկսել ԴԱԻՇ-ի գրոհայինների դեմ: Այս մասին հայտնում է The New York Times թերթի էլեկտրոնային տարբերակը:
Պարբերականի աղբյուրների հաղորդմամբ՝ Պենտագոնն արդեն ակտիվացրել է այդ երկրում հետախուզական տվյալների հավաքումը: Ռազմական արշավը կարող է ենթադրել «ավիահարվածներ հասցնել և ամերիկյան էլիտար ստորաբաժանումների հատուկ գործողություններ»:
Թերթը նշում է, որ Սպասվում է, որ Վաշինգտոնին կաջակցեն, մասնավորապես, Մեծ Բրիտանիան, Ֆրանսիան և Իտալիան: The New York Times-ի գնահատմամբ՝ ԱՄՆ նախագահ Բարաք Օբամայի վարչակազմը ծրագրում է «երրորդ ճակատ բացել ԴԱԻՇ-ի դեմ պայքարում»՝ Կոնգրեսում խորհրդակցություններ չանցկացնելով դրա հետ կապված ռիսկերի վերաբերյալ:
Պարբերականը նշում է, որ ծրագրերը, որոնց մասին խոսվոմ է, «լուրջ մտավախություններ են առաջացնում»: «Նոր ռազմական միջամտությունը Լիբիայում լուրջ իրադարձություն կդառնար, որի պատճառով ռազմական գործողություններին հեշտությամբ կարող են ներքաշվել Աֆրիկայի այլ երկրներ ևս,- նշում է թերթը:- Դրա հետ կապված՝ ծրագրեր պատրաստվում են այն ժամանակ, երբ ամերիկացի զինվորականները գնալով ավելի են ներգրավվում ավելի ռիսկային ու վտանգավոր գործողությունների Սիրիայում և Իրաքում»:
Ավելի վաղ հաղորդվում էր, որ իրավիճակը Լիբիայում ընթացիկ ամսում զգալիորեն սրվել է: ԴԱԻՇ-ի գրոհայիններն ակտիվացրել են հարձակողական գործողությունները երկրի հյուսիսում և փորձում են նավթի արտահանման նավահանգիստներ գրավել Սիրթի մերձափնյա տարածքում: Որոշ միջազգային դիտորդների տեղեկությամբ՝ Լիբիայի տարածքում ներկայումս գործում է ԴԱԻՇ-ի մոտ 3 000 գրոհային:
