Հայաստանում օտար ներդրումների մակարդակը ցանկալիից ու պահանջվածից ցածր է, ու պետությունը պարտավոր է նպաստել նրանց աճին: Այդ պատճառով էլ հաճախ անհրաժեշտ ուշադրություն չի դարձվում օտար փողերի ծագմանը և այն, նպատակներին, որ իրականում հետապնդում են օտարերկրյա ներդրողները:
Հիմնականում օտար փողերի ծագման մասին խոսում են այն ժամանակ, երբ ներդրողներն ինչ-որ անդեմ, անհայտ ընկերություններ են, հաճախ օֆշորային ծագմամբ, և նրանք միանգամից Հայաստանում տեր են դառնում խոշորագույն բիզնեսների: Օրինակ՝ մեծավ մասամբ, այդպես էլ մեր հասարակությանն անհայտ են մնում Հայաստանի տնտեսության ամենախոշոր ու եկամտաբեր ճյուղի՝ լեռնարդյունաբերության ձեռնարկությունների իրական տերերը: Իսկ երբ բազմաչարչար գիգանտ «Նաիրիտի» մասին ՀՀ վարչապետ Հովիկ Աբրահամյանը հայտարարեց, որ չգիտի, թե ով է նրա սեփականատերը, դա ոչ թե միայն ծիծաղելի էր կամ ցավալի, այլ ցույց է տալիս, որ օտարները վարում-ցանում են Հայաստանում, առանց անհրաժեշտ պետական վերահսկողության:
Իրականում սա Հայաստանի ազգային անվտանգության սպառնալիք է, երբ երկրի ակտիվները հանձնվում են ինչ-որ անհայտ օտար ընկերությունների, որոնք առկա ամենաթողության պայմաններում որևէ պատասխանատվություն չեն կրում ոչ Հայաստանի, ոչ էլ անգամ իրենց ունեցվածքի համար:
Սակայն անվտանգության սպառնալիքները միայն խոշոր ընկերություններից չեն գալիս, այլև փոքր, որոնք բիզնեսի անվան տակ անմիջականորեն աշխատում են մեր թշնամի երկրի Ադրբեջանի համար: Խոսքը մասնավորապես վերաբերում է «Սթարկոմ Արմենիա» կոչվող ընկերությանը, որը հանդես է գալիս համաշխարհային հայտնի Starcom Mediavest ընկերության բրենդի տակ: Այս ընկերությունը իր ադրբեջանական գործընկեր «Սթարկոմ Ադրբեջան» ընկերությանը պարբերաբար ամենամանրամասն, ամենապրոֆեսիոնալ մշակմամբ ու մակարդակի տեղեկատվություն է տրամադրում Հայաստանի լրատվամիջոցների և հանրային տրամադրությունների վերաբերյալ: Այս մշակումները ընդգրկում են բոլոր լրատվամիջոցները՝ հեռուստատեսության բոլոր ալիքները, հիմնական ինտերնետային կայքերը, ռադիոն, տպագիր մամուլը: Ամենակարևորը՝ որ այս ամենը կատարվում է բիզնես անելու քողի տակ:
Մեր ուսումնասիրությունը ցույց տվեց, որ «Սթարկոմ Արմենիայի» և «Սթարկոմ Ադրբեջանի» հիմնադիրը նույն «Վոստոկ Մեդիա Իքսչենջ» ընկերությունն է, որն օգտագործում է հայտնի գովազդային ընկերության անունը, իսկ իրականում կարևորագույն տեղեկատվության արտահոսք է ապահովում իր հայաստանյան ձեռնարկության միջոցով դեպի Ադրբեջան, ընդ որում՝ այս պրոցեսը, եթե այն կոչում են «բիզնես», սիմետրիկ չէ, այսինքն՝ նման տեղեկատվություն Հայաստան չի գալիս:
Համացանցի միջոցով այս «Վոստոկ Մեդիա Իքսչենջի» ծագումը պարզելու փորձերը հանգեցրին հետևյալ արդյունքների. այս ընկերությունը գրանցված է օֆշորային գոտում՝ Մալթայում: Սակայն սրանով «Վոստոկ Մեդիա Իքսչենջի» օֆշորային արկածները չեն ավարտվում. պարզվում է, որ մալթայական ընկերությունը հիմնադրված է ինչ-որ երրորդ՝ P.G.M GROUP SA ընկերության կողմից, որն էլ իր հերթին գրանցված է Բրիտանական Վիրջինյան կղզիներում: Վիրջինյան կղզիներից որևէ բան պարզելու փորձերը, բնականաբար, ապարդյուն անցան:
Թե ինչու և ում կողմից է սարքվել «Սթարկոմ Արմենիա»-«Վոստոկ Մեդիա Իքսչենջ»-P.G.M GROUP SA՝ Հայաստան-Մալթա-Վիրջինյան կղզիներ օֆշորային մատրյոշկան մի ընկերության համար, որը Հայաստանի վերաբերյալ մանրամասն տեղեկատվություն է տրամադրում Ադրբեջանին, մնում է միայն ենթադրություններ անել:
