Չնայած անցյալ տարի վարչապետ Հովիկ Աբրահամյանի որոշմամբ ձևավորվեց կոռուպցիայի դեմ պայքարի խորհուրդը, խորհրդի գործունեության արդյունքները տեսանելի չեն:
Հունվարի 27-ին «Թրանսփարենսի ինթերնեյշնլ» հակակոռուպցիոն կենտրոնը կհրապարակի տարբեր երկրների, այդ թվում՝ Հայաստանի կոռուպցիայի ընկալման ցուցանիշը: «Թրանսփարենսի ինթերնեյշնլ» հակակոռուպցիոն կենտրոնի հայաստանյան ղեկավար Վարուժան Հոկտանյանը մեզ հետ զրույցում ասաց, որ 2003 թվականից, երբ կանոնավոր մոնիտորինգ է անցկացվել, Հայաստանում կոռուպցիայի մակարդակը էականորեն չի փոխվել: Նրա խոսքերով՝ Հայաստանում կոռուպցիայի դեմ պայքարի իրական ցանկություն չկա, ու կոռուպցիայի իմաստով լճացած իրավիճակ է:
Կոռուպցիայի դեմ պայքարի խորհուրդը, որը ղեկավարում է վարչապետ Հովիկ Աբրահամյանը, հուլիսին գումարեց այս կառավարության օրոք առաջին նիստը: Բացի Հովիկ Աբրահամյանից, խորհրդի կազմում Հայաստանում կոռուպցիայի դեմ պայքարում են նաև ֆինանսների նախարար Գագիկ Խաչատրյանը, աշխատակազմի ղեկավար-նախարար Դավիթ Հարությունյանը, արդարադատության նախարարը, գլխավոր դատախազը, Հանրային խորհրդի նախագահ Վազգեն Մանուկյանը և որոշ ՀԿ-ներ:
Ընդդիմությունը, բացի ԲՀԿ-ից, բոյկոտեց կոռուպցիայի դեմ պայքարի խորհրդի աշխատանքը, ինչի առթիվ որոշակի դժգոհություն հայտնեց վարչապետ Հովիկ Աբրահամյանը: Նրա խոսքերով՝ ճիշտը ոչ թե «այգիներում խոսելն է կամ փողոց փակելը», այլ նման հարթակներում պայքարելը:
«Մենք ունենք կամք և վճռականություն ու պատրաստ ենք ամենօրյա աշխատանքով քայլ առ քայլ առաջ գնալու… Մեր աշխատանքները լինելու են թափանցիկ, և մենք ամեն ինչ կանենք, որպեսզի դրանց արդյունքները հանրության համար լինեն տեսանելի… Թեպետ մեր գործընկերներից մի մասը հրաժարվեցին մասնակցել խորհրդի աշխատանքներին, մենք հրավիրել ենք իրենց՝ ներկա գտնվելու այսօրվա նիստին»,- հուլիսին հայտարարեց Հովիկ Աբրահամյանը՝ հույս հայտնելով, որ ԱԺ ընդդիմադիր խմբակցություններն ու հասարակական կազմակերպությունները, որոնք հրաժարվեցին մտնել խորհրդի կազմի մեջ որպես անդամներ, կհամագործակցեն խորհրդի հետ:
«Մեր նպատակն է այս ձևաչափի շուրջ համախմբել այն ուժերին, կազմակերպություններին, որոնք իսկապես ասելիք ու պատկերացում ունեն մեր ընդհանուր նպատակներին հասնելու ճանապարհին: Հավաստիացնում եմ՝ կառավարությունը գիտակցում է կատարվելիք քայլերի անհրաժեշտությունն ու կարևորությունը և հետևողականորեն առաջ է մղելու հակակոռուպցիոն բարեփոխումներին ուղղված գործընթացը»,- ասել էր վարչապետը:
«Կոռուպցիայի դեմ պայքարի խորհուրդը այս պահին ձևական բնույթ է կրում՝ այն իմաստով, որ օրենքների փոփոխությունները, իրավական այլ ակտերի փոփոխությունները միաժամանակ պետք է զուգակցվեն այնպիսի պրակտիկ քայլերով, որոնք արդեն միայն խորհուրդը չի, որ պետք է կատարի: Շատ ավելի լուրջ քայլեր պետք է կատարվեն՝ ներառյալ այլ մասնակիցների կողմից, այդ թվում՝ քաղաքացիական հասարակության, լրատվամիջոցների»,- երեկ մեզ հետ զրույցում ասաց «Թրանսփարենսի ինթերնեյշնլ» հակակոռուպցիոն կենտրոնի հայաստանյան ղեկավար Վարուժան Հոկտանյանը՝ հավելելով, որ այսօր հասարակության մեջ ընդհանուր ապատիայի մթնոլորտում չկա պահանջարկ լրջորեն նվազեցնելու կոռուպցիան Հայաստանում և լրջորեն պայքար մղելու: «Այդ դրայվը, ցանկությունը ես չեմ տեսնում»,- ասաց հակակոռուպցիոն կենտրոնի ղեկավարը:
Ըստ նրա՝ փակուղային իրավիճակից միակ ելքը ներկա տնտեսական իրավիճակում համակարգային տնտեսական բարեփոխումներն են, որոնք ազդակ կդառնան կոռուպցիայի դեմ իրական պայքարի համար: «Երևի եկել է ժամանակը լուրջ տնտեսական ռեֆորմների, ինչպես Սինգապուրում եղավ 60-ականների սկզբներին: Այդ տնտեսական լուրջ բարեփոխումները իրենք կծնեն պահանջարկ կոռուպցիան կրճատելու»,- ասաց Հոկտանյանը:
Ի դեպ՝ 2015-2018թթ. հակակոռուպցիոն ռազմավարության հայեցակարգով կառավարությունը կոռուպցիայի դեմ պայքարում է չորս ոլորտներում՝ առողջապահություն, կրթություն, պետական եկամուտների հավաքագրում և ոստիկանություն:
