ԱՄՆ-ը, ինչպես նախկինում, կարծում է, որ Բաշար Ասադը չի կարող ապագայում լինել Սիրիայի առաջնորդը և պետք է հեռանա: Ամերիկյան կառավարության այդ դիրքորոշումն է հաստատել Սպիտակ տան մամլո քարտուղար Ջեյ Քարնին: Նրան խնդրել են մեկնաբանել Սիրիայի հարցով պայմանավորվածությունները, որոնք Մոսկվայում ձեռք է բերել ԱՄՆ պետքարտուղար Ջոն Քերին: Այս մասին հայտնում է ITAR-TASS-ը:
Քարնին կրկնել է, որ ԱՄՆ-ի կարծիքով՝ Ասադը կորցրել է սիրիացի ժողովրդին ներկայացնելու իրավունքը: «Մեր դիրքորոշումն այն է, որ Ասադը չի կարող լինել Սիրիայի առաջնորդն ապագայում և պետք է հեռանա»,- ընդգծել է Սպիտակ տան ներկայացուցիչը: Նա նշել է, որ որոշումը, թե Սիրիայում անցումային փուլում քաղաքական փոխակերպումը ինչպես կիրականանա, և թե ովքեր կմասնակցեն դրան, պետք է կայացնեն սիրիացիները:
Մայիսի 7-ին Մոսկվայում Ռուսաստանի արտգործնախարար Սերգեյ Լավրովի հետ Ջոն Քերիի հանդիպման ժամանակ ձեռք է բերվել պայմանավորվածություն 2012-ի հունիսին ընդունված ժնևյան կոմյունիկեի պլատֆորմի վրա միջազգային կոնֆերանսի գումարման մասին՝ ուղղված Սիրիայում ճգնաժամի հաղթահարմանը:
