Սիրիայում վերջերս տեղակայված ԱՄՆ զինված ուժերի հատուկ նշանակության ջոկատները փնտրում են զինված ընդդիմության ջոկատներ, որոնք ընդունակ են հակազդելու ԴԱԻՇ-ին, և օգնելու Վաշինգտոնի գլխավորած միջազգային կոալիցիային: Այդ ձևով է բացատրել Սիրիայում ամերիկյան հատուկ ծառայության ջոկատների դերը պաշտպանության նախարար Էշթոն Քարտերը` կիրակի օրը CNN հեռուստաալիքի եթերում ցուցադրված հարցազրույցում:
Այն հարցին, թե նա թույլատրում է Սիրիայում ռազմական ներկայության ավելացում, Պենտագոնի ղեկավարը խուսափողական պատասխան է տվել․ «Մենք հնարավորություններ ենք փնտրում անելու ավելին, քան ներկայումս, այլ ոչ թե առիթ փոխարինելու տեղական ուժերին»:
Պաշտպանության նախարարը մի քանի անգամ կրկնել է, որ Սիրիայում հատուկ նշանակության ջոկատի դերը բացարձակապես «ռազմավարական խնդիրներ լուծելու մեջ է»: «Դա լուրջ գործ է: Ես ամերիկացիներին խնդրում եմ դա հասկանալ: Դա ռազմավարություն է, այլ ոչ թե փոխարինում»,- ասել է նա:
Ավելի վաղ, Քարթերը տեղեկացրել էր, որ ԱՄՆ-ի զինված ուժերի հատուկ նշանակության ջոկատը Սիրիայում կապ է հաստատել զինված ընդդիմության հետ, և մասնավորապես զբաղվում է ԴԱԻՇ-ին նոր հարվածներ հասցնելու նպատակակետերի որոշմամբ:
