Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է Արայիկ Սարգսյանի գործի դատական քննությունը:
32-ամյա Արայիկը նախկինում դատվել է խարդախությունների համար:
Վերջին անգամ 2014 թվականի հունիսին Լոռու մարզի ընդհանուր իրավասության դատարանը 8 դրվագ խարդախությունների համար Արայիկ Սարգսյանին դատապարտել էր 4 տարի 6 ամիս ազատազրկման:
Պատժի 2 տարի 1 ամիս 27 օրը կրած լինելու և «Վանաձոր» ՔԿՀ-ում պատժի կրումը շարունակելու պայմաններում Արայիկը հենց կալանավայրից նորից կատարել է խարդախություն, ինչի համար նրան մեղադրանք է առաջադրվել իր «նախասիրած» հոդվածով:
Ըստ մեղադրանքի՝ Արայիկ Սարգսյանը 2015 թվականի սեպտեմբերի 27-ին կալանավայրից զանգահարել է Ստեփանավանի բժշկական կենտրոնի բժիշկ-գինեկոլոգ Ա. Դ.-ին, ներկայացել է որպես Լոռու մարզպետ Արթուր Նալբանդյան, խոստացել է գինեկոլոգին նշանակել Վանաձորի բժշկական կենտրոնի տնօրենի պաշտոնում և նրանից փաստաթղթեր է պահանջել՝ հանձնարարելով փաստաթղթերը փոխանցել Միքայելյան ազգանունով անձնավորությանը:
Այնուհետև Արայիկ Սարգսյանը ծանոթի՝ Վ. Միքայելյանի միջոցով պարբերաբար զանգահարել է գինեկոլոգին, վստահեցրել է, որ տնօրենի պաշտոնին նշանակվելու համար անհրաժեշտ է 1 միլիոն դրամ, որը պետք է փոխանցել պահանջվող փաստաթղթերի հետ միասին:
Հեռախոսային «բանակցությունները» ավարտվել են նրանով, որ գինեկոլոգը դիմել է ԱԱԾ, հայտնել է վերոհիշյալ հեռախոսազանգերի մասին:
Արայիկ Սարգսյանի կողմից պահանջված գումարի մի մասը՝ 150 հազար դրամը, հայտնաբերվել ու վերցվել է ԱԱԾ աշխատողների կողմից:
Արայիկ Սարգսյանին, ըստ մեղադրանքի՝ «չի հաջողվել հանցագործությունն ավարտին հասցնել իր կամքից անկախ հանգամանքներում»:
Արայիկ Սարգսյանն իրեն մեղավոր է ճանաչել խարդախության փորձի համար՝ ՀՀ քրեական օրենսգրքի 34-178 հոդվածի 2-րդ մասի 2-րդ կետով:
Նրա միջնորդությամբ գործը քննվել է արագացված ընթացակարգով:
Դատարանը հաշվի է առել, որ Արայիկի խնամքին են մինչև 14 տարեկան 3 երեխաները:
Որպես նրա պատասխանատվությունն ու պատիժը ծանրացնող հանգամանք՝ արձանագրվել է հանցագործությունների կատարման վտանգավոր ռեցիդիվը:
Գործով որպես իրեղեն ապացույց էին ճանաչվել առգրավված 150 հազար դրամը, գինեկոլոգ Ա. Դ.-ի փաստաթղթերի պատճենները…
Արայիկ Սարգսյանը մեղավոր է ճանաչվել խարդախության փորձի համար, դատապարտվել է 3 տարի 4 ամիս ազատազրկման, այս պատժին մասնակիորեն գումարվել է նախորդ պատժի չկրած մասից, և վերջնական պատիժ է սահմանվել 5 տարի ազատազրկումը:
Պատժի սկիզբը՝ 2015 թվականի դեկտեմբերի 28-ից:
