Վերաքննիչ քրեական դատարանի վարույթում է Հայկ Մ.-ի գործի դատական քննությունը:
Գործը քննվել է Աջափնյակ և Դավթաշեն վարչական շրջանների ընդհանուր իրավասության դատարանում Տաթևիկ Գրիգորյանի նախագահությամբ:
40-ամյա Հայկին մեղադրանք էր առաջադրվել նախկին կնոջը ծեծելու համար՝ ՀՀ քրեական օրենսգրքի 118 հոդվածով:
Ըստ մեղադրանքի՝ 2015 թվականի հուլիսի 19-ին, ժամը 22-ի սահմաններում դստերը նախկին կնոջը վերադարձնելու համար առանց նախազգուշացման Հայկը գնացել է նրա տուն, բայց նախկին կինը տանը չի եղել:
Դրա պատճառով ժամը 23-ի սահմաններում Հայկը այդ բնակարանի հյուրասենյակում թքել է տուն վերադարձած նախկին կնոջ դեմքին, մի ձեռքով բռնել է մազերից, մյուս բռունցքով հարվածներ է հասցրել կնոջ գլխին, ինչից հետո հրել-վայր է գցել նրան՝ պատճառելով ֆիզիկական ցավ ու առողջության թեթև վնասի հատկանիշներ չպարունակող վնասվածք՝ արյունազեղման ձևով:
Դատարանը հաստատված է գնահատել, որ տուժող կինը՝ Արմինեն (անունը փոխված է), ամբաստանյալ Հայկի հետ ամուսնացել է 1999 թվականին: Համատեղ ամուսնական կյանքի ընթացքում ունեցել են երկու երեխա, ծնված՝ 1999 և 2009 թվականներին:
Մոտ 5 տարի առաջ ամուսինները բաժանվել են, նրանց հարաբերությունները մնացել են լարված:
Արմինեն, ով մասնագիտությամբ լրագրող է, դատարանում ասել է, թե ամբաստանյալի նկատմամբ թշնամանք չունի: Ամուսնալուծությունից հետո ինքը չի խոչընդոտել նախկին ամուսնու և երեխաների շփմանը, հատկապես՝ փոքր երեխայի հետ շփմանը: Իրենց ավագ որդու հետ Հայկը ժամանակ առ ժամանակ տևական կոնֆլիկտներ է ունեցել, նրան չի տեսակցել:
Շուրջ երկու-երեք տարի առաջ ինքն արգելել է, որ Հայկն իրենց դստերը տանի գյուղ, քանի որ իր կարծիքով՝ երեք տարեկան երեխային առանց մոր խնամքի թողնելն այնքան էլ ճիշտ չէ:
Արդյունքում երեխայի ներկայությամբ ծեծ է եղել, Հայկն իրենից խլել է երեխային ու առանց իր համաձայնության տարել է:
Ինքը, օրենքներին ծանոթ չլինելով, դիմել է ոչ թե ոստիկանություն, այլ՝ «Կանանց իրավունքների պաշտպանության կենտրոն»:
Վերջերս դարձյալ ծեծ է եղել ոսկեղենը վերադարձնելու հետ կապված: Ինքը ոստիկանություն է կանչել: Հայկի հետ բացատրական աշխատանք են տարել, նա պարտավորվել է այլևս իրեն չանհանգստացնել:
Դրանից հետո ինքը նրան արգելել է իր տուն մտնել:
2015 թվականի հուլիսի 18-ին Հայկը իր սովորության համաձայն եկել ու կրտսեր երեխային վերցրել է: Նա երբեք տեղյակ չի պահել երեխային վերցնելու և վերադարձնելու ժամերի մասին: Նրա հետ հնարավոր չի եղել համաձայնության գալ, քանի որ նա իր հետ չի շփվել:
Դեպքի օրը՝ հուլիսի 19-ին, ավագ որդին ընկերների հետ է եղել, ինքն էլ որոշել է ընկերուհուն հանդիպել: Տանից դուրս է եկել ժամը 22-ին:
Կես ժամ անց զանգել է որդին ու ասել է, թե իրեն զանգել է Հայկի հայրն ու ասել է, թե Հայկը երեխային հետ է բերում:
Ինքը որդու հետ պայմանավորվել է հանդիպել շենքի բակում, միասին բարձրացել են բնակարան:
Այնտեղ տեսնելով Հայկին՝ նրա հայացքից հասկացել է, որ նա շատ զայրացած է:
Երեխաներին խնդրել է գնալ ննջարան:
Ինքը ցանկացել է Հայկին դուրս հրավիրել բնակարանից, բայց նա զայրացած մոտեցել է իրեն, թքել է իր երեսին և ուշ ժամին տուն վերադառնալու համար անվանել է «անբարոյական»:
Ինքը Հայկին դուրս է հրավիրել տանից, բայց հասկացել է, որ նա ծեծելու է իրեն: Իրենց որդին արդեն մեծ է, ինքը վախեցել է, որ նա կխառնվի իրենց վեճին:
Հայկը բռնել է իր մազերից, գլուխն իջեցրել է ներքև, սկսել է հարվածել իր գլխին ու դեմքին: Հնարավոր է , որ այդ ժամանակ ինքն անկանոն շարժումներ արած լինի ու ճանկռած լինի նրան:
Հայկը իրեն հրել-գցել է գետնին ու հեռացել է:
Ինքը շատ ուժեղ ցավ է զգացել: Նույնիսկ կարծել է, թե գիտակցությունը կորցնում է: Հայկն իր գլխին խփել է երեք-չորս անգամ: Ինքը Հայկին չի հարվածել:
Արմինեն ասել է, թե ցանկանում է, որ Հայկը ենթարկվի քրեական պատասխանատվության, որպեսզի երեխաներն այլևս ներկա չլինեն նման միջադեպերի, ինքը կարողանա ապահով ապրել:
Դեպքից հետո որդին իրեն «Վալերյանկա» է տվել, որովհետև ինքն ամբողջ մարմնով դողում էր:
Դեպքը արագ է կատարվել, տևել է մոտ երեք րոպե, ինքը օգնություն չի կանչել: Դեպքի մասին ինքը հայտնել է իր մորաքրոջ տղային: Հաջորդ օրը գնացել է ոստիկանություն և հաղորդում է տվել: Ինքը չի իմացել, որ Հայկն էլ բողոք է ներկայացրել իր դեմ…
Ամբաստանյալ Հայկ Մ.-ն դատարանում հրաժարվել է ցուցմունքներ տալուց: Նա պատասխանել է կողմերի հարցերին:
Հայկը հայտնել է, թե ինքը Արմինեին չի հարվածել, Արմինեն է հարվածել իր դեմքին՝ քթի շրջանում:
Նախկինում իրենց միջև վիճաբանություններ եղել են, բայց ուժ չի կիրառվել: Դեպքի պահին ինքը չի հարվածել, տուժողը ստում է, թե երեք-չորս հարված է հասցրել նրան:
Դեպքի օրը իրեն հունից հանել է այն, որ Արմինեն այդ ժամին տանը չի եղել, բայց կարգադրություններ է արել, թե ինքը երեխային ում տուն տանի՝ մինչև ինքը վերադառնա: Եթե նա աշխատանքի լիներ, ինքը կհասկանար, բայց նա ինչ-որ միջոցառումների է մասնակցել, դա իրեն հունից հանել է:
Երբ ինքը թքել է նրա դեմքին, նա սկսել է ճանկռել իրեն, որից հետո ինքը բռնել է նրա ձեռքերից ու հետ է հրել: Նա ցանկացել է հարվածել իրեն, մի հարվածը դիպել է իր դեմքին, ինքը ցավ է զգացել: Այդ հարվածից հետո ինքը բռնել է նրա մազերից, հետ է հրել ու դուրս է եկել բնակարանից:
Տուժողն իրեն զրպարտում է, քանի որ նա ու իրենց որդին իր հետ լարված հարաբերությունների մեջ են: Պատճառը կնոջ կատարած սխալ քայլերն են: Այդ պատճառով ինքը նրան «մշտապես իր տեսադաշտում է պահում», քանի որ նա իր երեխաների մայրն է, ինքը չի ցանկանում, որ իրենց երեխաները «վարկաբեկվեն»:
Տուժողը ցանկանում է «մեկուսացնել իրեն», որպեսզի ինքը չկարողանա «հսկել» նրան, բայց նման բան լինել չի կարող, քանի որ ինքը երեխա ունի:
Ինքը Արմինեի տուն գնացել է այն ժամանակ, երբ դրա կարիքն է զգացել, այնտեղից էլ դուրս է եկել, երբ դուրս գալու կարիք է զգացել, որևէ թույլտվություն չի հարցրել նրանից…
Դեպքի պահին ինքն իրեն տիրապետել է, որ Արմինեին ֆիզիկական ցավ կամ վնասվածք չպատճառի: Ինքը նրա մազերից բռնելու դիտավորություն չի ունեցել, ուղղակի «այդ պահին այդպես է հարմար եղել»…
Քրեական գործի նախաքննության ժամանակ ցանկացել է հաշտվել տուժողի հետ, որ քրեական գործը կարճվի, բայց տուժողը չի ցանկացել իր հետ հաշտվել:
Մի անգամ գիշերը համացանցի «Օդնոկլասնիկի» կայքով տեսել է, որ Արմինեն կայքում է, գնացել է նրա շենքի բակ, տեսել է, որ բնակարանի լույսը վառվում է: Ծեծել է նրա բնակարանի դուռը, բայց Արմինեն չի բացել, ասել է՝ քո գործը չի: Ինքը հեռացել է:
Ինքը նրան չի անհանգստացրել, բայց «պահել է տեսադաշտում, որ իմանա՝ ում հետ է հանդիպում, շփվում, ինչով է զբաղվում…»:
Դեպքից հետո՝ օգոստոսի 1-ին, շենքի բակում տեսել է դստերը, գրկել, սիրել է նրան, հետը խաղացել է: Ցանկացել է երեխայի հետ մի քիչ հեռու գնալ, բայց Արմինեն քաշել է երեխայի ձեռքից, ինքն էլ նրան ասել է. «Թու, թքեմ երեսիդ», բայց չի թքել, միայն նրան «հիմար» է անվանել, իսկ Արմինեն իրեն ասել է՝ ոչխար: Ինքը նրան նույն կերպ է պատասխանել ու հեռացել է…
Ընդհանուր իրավասության դատարանը Հայկ Մ.-ին մեղավոր է ճանաչել կնոջ նկատմամբ բռնություն գործադրելու, նրան ծեծելու համար՝ ՀՀ քրեական օրենսգրքի 118 հոդվածով, և դատապարտել է տուգանքի՝ 70 հազար դրամի չափով:
Այս դատավճռի դեմ վերաքննիչ բողոք է բերել ամբաստանյալի շահերի պաշտպանը՝ պահանջելով բեկանել մեղադրական դատավճիռը և Հայկ Մ.-ի նկատմամբ կայացնել արդարացման դատավճիռ:
