Իշխանության բարի կամքով ԲՀԿ-ն գումար բաժանեց և այդքան տոկոս ստացավ: Այսօր «Առաջին լրատվական»-ի հետ հանդիպման ժամանակ այս մասին ասաց «Ժողովրդավարական հայրենիք» կուսակցության նախագահ Պետրոս Մակեյանն՝ անդրադառնալով Երևանի ավագանու ընտրություններին և դրանից հետո մանդատները վայր դնելու մասին խոսակցություններին:
Պետրոս Մակեյանը նշեց, որ մանդատները չվերցնելու հարցը, որն այսօր ակտիվ քննարկումների առարկա է դարձել, բարձրացավ նաև խորհրդարանական ընտրություններից հետո: «Ինչո՞ւ վերցրեցին այդ մանդատները, իմաստ չկա, անելիք չկա: Ստեղծված իրավիճակում ճիշտ կլինի, որ ԱԺ մանդատներից հրաժարվեն բոլոր ուժերը և ավագանու կազմում ստացած մանդատները ևս չվերցնեն: Միայն այս դեպքում երկրում կարող է իրավիճակ ստեղծվել, հակառակ դեպքում միայն մանդատներից հրաժարվելը, վերցնել-չվերցնելը ոչինչ չի փոխի, որովհետև Երևանի ավագանու նախորդ ընտրությունների ժամանակ ՀԱԿ-ը չօգտվեց իր մանդատներից, որը որևէ բան չփոխեց:
Եթե ՀԱԿ-ը, ՀՅԴ-ն, «Ժառանգություն»-ը, ԲՀԿ-ն, որն իրեն այլընտրանք է համարում, իրենց պատգամավորական մանդատները վայր դնեն, շատ բան կփոխվի, քաղաքական նոր իրավիճակ կստեղծվի, բայց ավագանու մանդատներ չվերցնելով բան չի փոխվի»,- նշեց Պետրոս Մակեյանը:
Անդրադառնալով բուն ընտրություններին՝ նա ասաց, որ պետք է էլի արձանագրել, որ ԲՀԿ-ն իշխանական դաշտում է: Ըստ նրա՝ կար ժամանակ, երբ իշխանությունները պահում էին հաճախորդներ իրենց համար, իսկ հիմա իշխանության հաճախորդն է հաճախորդ պահում:
«Հիմա իշխանության հաճախորդ ԲՀԿ-ն պահում է հաճախորդ, որն էլ ՀԱԿ-ն է, ցավոք սրտի: Այս ընտրություններն էլ ցույց տվեցին, որ ԲՀԿ-ն հնարավորություն չունի այլ դաշտում խաղալու: ԲՀԿ-ն ընտրակաշառք բաժանեց, բայց դա արեց իշխանության բարի կամքով, այդքան տոկոս ստացավ ՀՀԿ-ի բարի կամքով, որն էլ ապացուցում է իմ ասածը: Բուրժուադեմոկրատական հեղափոխությունը, որին, ցավոք սրտի, մասնակցում է նաև ՀԱԿ-ը, ևս իշխանության ծրագիրն է»,- ասաց Պետրոս Մակեյանը:
Նա նշեց, որ այս ընտրություններում Երևանը կարող էր ընդդիմադիր քաղաքապետ ունենալ, եթե միավորվեին իսկապես ընդդիմադիր ուժերը: Դա, նրա համոզմամբ, կարող էր քաղաքական իրավիճակ փոխել երկրում:
