Վերջին շրջանում շշուկներ են պտտվում այն մասին, որ Xbox խաղային ապարատի նոր մոդելը կաշխատի միայն ակտիվ ինտերնետ միացման դեպքում: Սակայն լրագրողների տրամադրության տակ է հայտնվել Microsoft-ի ներկորպորատիվ նամակը, որից երևում է, որ խաղային ապարատը նորմալ կգործի նաև օֆլայն ռեժիմում: Այս մասին հայտնում է Vesti-ն:
«Durango (նոր Xbox-ի ծածկանունն է) ստեղծված է այն բանի համար, որ դառնա ժամանցային արդյունաբերության ապագան»,- գրում է Microsoft-ն ու հավելում, որ առանց ակտիվ ինտերնետ միացման օգտատերերը կարող են նայել Blu-ray սկավառակներ, հեռուստահաղորդումներ և խաղալ խաղեր միայնակ: Տեքստից կարելի է հասկանալ, որ նոր Xbox-ն իսկապես, ինչպես հաստատել են մի քանի աղբյուրներ, կունենա HDMI ելքային բնիկ՝ հեռուստաընդունիչին միանալու համար, ինչի արդյունքում կարելի է հեռուստահաղորդումները դիտել խաղային սարքի ինտերֆեյսից:
Դեռևս հասկանալի չէ, թե ինչպես սարքում կիրագործվի օֆլայն աշխատանքի ռեժիմը: Հավանաբար այն կլինի լիարժեք ավտոնոմ, ինչպես Xbox 360-ը, որում խաղացողները կարող էին խաղեր տեղադրել և խաղալ առանց համացանցին միանալու:
