Սիրիայի նախագահ Բաշար Ասադը Իրանի արտգործնախարար Ալի Աքբար Սալեհիի հետ Դամասկոսում կայացած հանդիպման ժամանակ հայտարարել է, որ Գոլանի բարձունքները առաջիկայում կդառնան Իսրայելի ագրեսիային դիմակայելու ճակատ: Այս մասին հաղորդում է լիբանանյան «Ալ-Մայադին» հեռուստաալիքը:
«Իսրայելի ագրեսիան ցույց է տալիս Իսրայելի, որոշ արևմտյան երկրների ներգրավվածության աստիճանը Սիրիայում կատարվող իրադարձություններին: Ահաբեկիչների և ծայրահեղականների դեմ պայքարում բազմաթիվ հաջողությունների հասած սիրիացի ժողովուրդը կարող է դիմակայել Իսրայելին, որը ահաբեկչության կենտրոններից մեկն է, և որի հետ Սիրիան բախվում է ամեն օր»,- ասել է Բաշար Ասադը:
Երեքշաբթի օրը «Պաղեստինի ազգային ազատագրական ճակատ»-ի ներկայացուցիչ Անվար Ռաջան հայտնել է, որ Սիրիայում պաղեստինյան խմբավորումները երկրի իշխանություններից թույլտվություն են ստացել Գոլանի բարձունքներում գործողություններ իրականացնել Իսրայելի դեմ և առաջիկայում մտադիր են սկսել դրա նախապատրաստական աշխատանքները:
