Արգենտինայի կառավարությունը հարկային համաներում է հայտարարել բոլոր նրանց համար, ովքեր կներդնեն իրենց չհայտարարագրված դոլարներն ազգային տնտեսությունում: Այս մասին հայտնում է ITAR-TASS-ը՝ հղում անելով հանրապետության տնտեսության նախարար Էրնան Լորենսինոյին:
Երկրի իշխանությունները հայտարարել են, որ դոլարներ ունեցող քաղաքացիները կարող են դրանք օրինականացնել ենթակառուցվածքային պարտատոմսեր ձեռք բերելու միջոցով, ստացված գումարները կուղղվեն էներգետիկ նախագծերի իրականացմանը: Որպես ներդրման այլ տարբերակ՝ կառավարությունն առաջարակել է ձեռք բերել Կենտրոնական բանկի խնայողական սերտիֆիկատները, որոնցից ստացված միջոցները կուղղվեն շինաշխատանքներին:
Շատ արգենտինացիներ նախընտրում են իրենց խնայողությունները պահել դոլարներով, միևնույն ժամանակ երկրում փաստացի գործում է դոլար ձեռք բերելու արգելքը: Արտասահմանյան արժույթն ազատ կարելի է գնել սև շուկայում այն արժեքով, որը գրեթե կրկնակի գերազանցում է երկրի Կենտրոնական բանկի սահմանած պաշտոնական փոխարժեքը:
Փորձագետները թերահավատորեն են վերաբերվել Արգենտինայի իշխանությունների առաջարկին: