Գյումրիում տեղակայված ռուսական 102-րդ ռազմաբազայի տարածքում ընթանում է Ավետիսյանների 7 հոգանոց ընտանիքի սպանության գործով արտագնա դատական երկրորդ նիստը:
Դատարանը մերժեց Ավետիսյանների սպանության գործը քննող դատավորին ինքնաբացարկի միջնորդությունը:
Տուժող կողմը դատական նիստը հետաձգելու միջնորդություն ներկայացրեց: Դատարանը բավարարեց միջնորդությունը: Ավետիսյանների սպանության գործով դատական հաջորդ նիստը տեղի կունենա հունվարի 22-ին՝ ժամը 12:00-ին:
Նշենք, որ տուժողի իրավահաջորդի ներկայացուցիչ Արթուր Սաքունցն Ավետիսյանների սպանության գործը քննող դատավորին ինքնաբացարկի միջնորդությունը ներկայացրեց՝ նշելով.
«Դատարանն ակնհայտ կանխակալ վերաբերմունք ունի տուժող կողմի նկատմամբ: Անցած դատական նիստին մենք միջնորդություն ներկայացրեցինք, ինչը դատարանի կողմից մերժվեց, մերժվեց նաեւ դատավարությունը ՇՄ ընդհանուր իրավասության դատարանում անցկացնելու մասին միջնորդությունը: Դա հիմք է տալիս ենթադրելու, որ կա կանխակալ վերաբերմունք տուժող կողմի նկատմամբ: Ուստի ինքնաբացարկ ենք հայտնում ձեզ»:
Լուսինե Սահակյանն ասաց, որ միանում է միջնորդությանը նաև այլ հիմքով. «Նկատի ունենալով այն հանգամանքը, որ դուք անկողմնակալ չեք կարող լինել, ինչու, նիստերն անցկացվում է քրեական դատավարության օրենսգրքի խախտումներով, մենք գիտենք, որ դուք տիրապետում եք օրենսգրքի նորմերին, այն որոշումները, որոնք դուք կայացնում եք, երբ ընդմիջում եք հայտարարում: Դուք կաշկանդված եք, ու այլ բան ասել չենք կարող, ես չեմ կարող ինքնաբացարկ հայտնել՝ ասելով, որ օրենքին չեք տիրապետում, ես գիտեմ, որ դուք օրենքներին տիրապետում եք: Դուք այս գործը չեք կարող քննել, դուք կաշկանդված եք, ուստի քանի որ դուք չեք կարող այս գործով անկողմնակալ որոշում կայացնել, իսկ մենք անկողմնակալ որոշման կարիք ունենք, ես ձեզ խնդրում եմ ինքներդ կայացրեք ինքնաբացարկի որոշում»,- հայտարարեց Լուսինե Սահակյանը:
