Լեհաստանում ԶԼՄ-ների և Սահմանադրական դատարանի մասին սկանդալային օրենքների հարցը պարտադիր չէ լուծել ԵՄ գործընթացի միջոցով, որը կարող է պատժամիջոցների հանգեցնել, պետք է խուսափել հիստերիկ արձագանքներից: RIA Novosti-ի հաղորդմամբ՝ այս մասին հայտարարել է Եվրախորհրդի նախագահ Դոնալդ Տուսկը:
«Լեհաստանը թշնամիներ չունի ո՛չ ԵՄ մակարդակով, ո՛չ Բրյուսելում»,- ասել է Տուսկը Լեհաստանի նախագահ Անջեյ Դուդայի հետ բանակցություններից հետո: Նա նշել է, որ «Եվրահանձնաժողովը բարեխղճորեն է գործում»:
«Ես կարող եմ պատկերացնել, որ այդ նպատակը կարող է այլ միջոցներով իրագործվել՝ ոչ պարտադիր սկսելով այդ գործընթացը»,- հայտարարել է Տուսկը:
Նրա խոսքով՝ այդ հարցում կարևոր է խուսափել «հիստերիկ արձագանքներից»:
«Հիստերիկ արձագանքները պարտադիր չեն: Ես չեմ խոսում այն մասին, թե ինչ են անում ինստիտուտները, այլ այն մասին, թե ինչ են անում քաղաքական գործիչները Լեհաստանում և այլ երկրներում»,- ասել է Տուսկը:
Եվրահանձնաժողովը հունվարի 13-ին Վարշավայի հետ երկխոսություն սկսելու մասին որոշում է ընդունել՝ Լեհաստանի կողմից եվրոպական նորմերի խախտումից խուսափելու համար: Եթե այդ երկխոսությունը ցանկալի արդյունքներ չբերի, կարող է գործընթաց սկսվել ԵՄ-ի մասին պայմանագրի 7-րդ հոդվածի շրջանակներում, որը ենթադրում է ԵՄ երկրի կողմից ԵՄ արժեքների «լուրջ խախտման ակնհայտ սպառնալիքի գոյության» կամ գոնե «լուրջ և կայուն խախտման գոյության» հաստատում: Որպես ծայրահեղ միջոց Լեհաստանը կարող է զրկվել ԵՄ նախարարների խորհրդում ձայնի իրավունքից:
Լեհաստանի նախագահ Անջեյ Դուդան ստորագրել է լրատվամիջոցներին վերաբերող օրենքի փոփոխությունները, որոնք լեհ լրագրողների կարծիքով՝ զգալիորեն խստացնում են մամուլի վերահսկողությունը: Ավելի վաղ հաղորդվել է, որ նոր օրենքի պատճառով աշխատանքից ազատվել են Լեհաստանի մի շարք հեռուստաալիքների ղեկավարներ: Քննադատությամբ են հանդես եկել ոչ միայն լեհ լրագրողները, այլև Եվրոպայի հեռարձակողների միությունը, Լրագրողների եվրոպական ֆեդերացիան և «Լրագրողներ առանց սահմանների» կազմակերպությունը:
Բացի դրանից՝ Դուդան դեկտեմբերի 28-ին հաստատել է Սահմանադրական դատարանի մասին օրենքում փոփոխությունները, որոնք խիստ վեճեր են առաջացրել երկրում: Սահմանադրական տրիբունալն արդեն ինքը չի որոշի, թե անդամներից որը պետք է այն լքի, այլ միայն սեյմի համար համապատասխան հայտ կպատրաստի: Նախագահի կամ արդարադատության նախարարի պահանջով ևս կարող է կարգապահական հետաքննություն սկսվել դատավորի նկատմամբ:
