Երեքշաբթի Նյու Յորքի Sotheby’s աճուրդում կցուցադրվեն հայտնի իմպրեսիոնիստների և մոդեռնիստների աշխատանքները: Ինչպես հաղորդում է ITAR-TASS-ը, ամերիկացի փոփ-աստղ Մադոննան աճուրդի է հանել ավելի քան 20 տարի իրեն պատկանող ֆրանսիացի հայտնի նկարիչ-մոդեռնիստ, կուբիզմի հիմնադիրներից մեկի՝ Ֆերնան Լեժեի «Երեք կանայք կարմիր սեղանի շուրջ» (1921թ.) կտավը: Ինչպես ակնկալվում է, կտավը կվաճառվի 5-7 միլիոն դոլարով: Ստացված միջոցները Մադոննան նախատեսում է տրամադրել «Լույսի ճառագայթ» բարեգործական հիմնադրամին՝ աջակցելու աղջիկների ուսուցմանը Պակիստանում և Աֆղանստանում:
Աճուրդի գլխավոր լոտը Պոլ Սեզանի «Խնձորներ» կտավն է (1889-1890թթ.), որը գնահատվում է 25-35 միլիոն դոլար: Կտավը աճուրդի է հանվել Ալեսքսա և Էլիզաբեթ Լևիտների անձնական հավաքածուից: Այդ հավաքածուն կներկայացնի նաև Ամադեո Մոդիլյանիի «Ամազոնուհին» կտավը: Ակնկալվում է, որ այն կվաճառվի առնվազն 20 միլիոն դոլարով: Լևիտների հավաքածուի վաճառքից ստացված գումարները կփոխանցվեն նրանց անունը կրող բարեգործական հիմնադրամին:
Աճուրդում կներկայացվեն նաև Պաբլո Պիկասոյի «Սիլվետ»-ը, Վինսենթ վան Գոգի «Սիրահարները Պրովանսում» կտավը և այլն:
