Սահմանադրության փոփոխությունների հանրաքվեի քարոզչության, բուն հանրաքվեի և դրան հաջորդող գործընթացների շրջանակներում քաղաքացիների, ԶԼՄ-ների և հասարակական դիտորդական կազմակերպությունների ներկայացրած դիմում-բողոքներից հունվարի 11-ի դրությամբ դատախազության կողմից ստեղծված աշխատանքային խումբը ուսումնասիրել է 514-ը, որոնցից միայն 56-ի դեպքում է հարուցվել քրեական գործ:
Նշենք, որ ընտրախախտումների վերաբերյալ մեկ քրեական գործ արդեն իսկ դատարանում է, և ուրբաթ օրը կհրապարակվի այդ գործով վճիռը։ Խոսքը Հայ ազգային կոնգրեսի անդամ Վարդան Հարությունյանին կաշառել փորձած Կենտրոն վարչական շրջանի աշխատակից Զավեն Միրիջանյանի մասին է, որի վերաբերյալ ձայնագրություն կա, սակայն մեղադրող դատախազը 3 տարի պայմանական պատիժ պահանջեց նրա համար՝ հաշվի առնելով Տարոն Մարգարյանից ստացած նրա շնորհակալագրերն ու մի շարք հիվանդությունների մասին փաստող տեղեկանքները։
Իրավապաշտպանից հետաքրքրվեցինք՝ կարելի՞ է ակնկալել, որ հանրաքվեից հետո միջազգային կառույցների, դեսպանությունների արտահայտած մտահոգությունները կարող են փարատվել նման իրավիճակում, երբ ակնհայտ հանցագործություն կատարած անձին դատապարտում են պայմանական պատժի։
Հարությունյանի խոսքով՝ հայաստանյան իշխանություններին բնավ էլ չեն մտահոգում միջազգային կառույցների արտահայտած մտահոգությունները, քանի որ իրենք նման մի քանի էտապով անցել են և լավ գիտեն, թե ինչ են իրենցից ներկայացնում այդ մտահոգությունները և պատժամիջոցները։
