ԱՄՆ-ը պետք է վերականգնի Իրանի դեմ պատժամիջոցները, վերականգնի իր ռազմական հզորությունը և Իսրայելում դեսպանատունը Թել Ավիվից տեղափոխի Երուսաղեմ: RIA Novosti-ի հաղորդմամբ՝ այս մասին հեռուստադեբատների ժամանակ հայտարարել է ԱՄՆ նախագահի հանրապետական թեկնածու Ջեբ Բուշը:
«Նախագահ Ջեբ Բուշի օրոք մենք կվերականգնենք մեր ռազմական հզորությունը»,- ասել է նա:
Բուշի խոսքով՝ ամերիկյան զինված ուժերի սարքավորումները հեռու են ժամանակակից համարվելուց: «Մենք զիջում ենք Չինաստանին, Ռուսաստանին, Իրանին և շատ այլ երկրների, որոնք մեզ նայում են ոչ այնպես, ինչպես մենք կցանկանայինք: Մենք պետք է վերականգնենք մեր ռազմական հզորությունը»,- ասել է Բուշը:
Նա կողմ է արտահայտվել «Իրանի դեմ պատժամիջոցների վերականգնմանը»: «Իրանցիներն արդեն խախտել են դրանք՝ միջուկային գործարքի ստորագրումից հետո հրթիռներ փորձարկելով»,- նշել է նա:
Բուշն «անհրաժեշտ» է համարել «(ԱՄՆ) դեսպանատունն Իսրայելում Թել-Ավիվից Երուսաղեմ տեղափոխումը»: Ըստ նրա՝ «դա կլինի լուրջ ազդանշան առ այն, որ մենք վերադարձել ենք խաղին»:
