Հունվարի 29-ին լրանում է Վազգեն Սարգսյանի անվան ռազմական ինստիտուտում դաժանորեն սպանված կուրսանտ Հայկազ Բարսեղյանի դեպքի մեկ տարին։ Ու թեև գործը հասել է դատարան, սակայն կուրսանտի հոր՝ Արկադի Բարսեղյանի համար շարունակում են չպարզված հարցեր մնալ։ Միակ մխիթարիչ հանգամանքն այն է, որ նախօրեին սպանության մեջ մեղադրվող Գնել Թևոսյանի հոր՝ Երևանի Վ. Սարգսյանի անվան ռազմական ինստիտուտի պետի նախկին տեղակալ, գնդապետ Զարմիկ Թևոսյանի գործով նախաքննությունն ավարտվել է և գործն ուղարկվել դատարան: Ըստ մեղադրական եզրակացության՝ գնդապետն իր որդու համար ինստիտուտում արտոնյալ պայմաններ է ստեղծել։
Հայկազ Բարսեղյանի գործով դատական նիստն այսօր, սակայն, կրկին հետաձգվեց։ Դատարան չէին բերել մեղադրյալներից Վարազդատ Սաֆարյանին, ով ծառայում է բանակում։ Դատական նիստը փակվելուն պես՝ մեղադրյալները՝ ժպիտը դեմքներին, հեռացան դատարանի դահլիճից, իսկ գնդապետի որդին՝ կրկին ժպիտը դեմքին, կուրսանտի հորը աչքով արեց, ինչը հարուցեց հոր զայրույթը։ Վերջինս դատարանից խնդրեց կարգի հրավիրել Գնել Թևոսյանին։
Ի դեպ, Արկադի Բարսեղյանը լրագրողների հետ զրույցում նշեց, որ իր որդու սպանության ականատես ծառայակիցներից երկուսի մոտ արդեն իսկ հոգեկան խնդիրներ կան, իսկ նրանցից մեկ ուրիշն արդեն հոգեբուժարանում է։
Գործով հաջորդ դատական նիստը նշանակվեց փետրվարի 4-ին։
