Եգիպտոսի կառավարությունը լրացուցիչ միջոցներ կձեռնարկի զբոսաշրջիկների անվտանգության ապահովման համար և այդ նպատակով բյուջեից արդեն հատկացրել է 250 մլն եգիպտական ֆունտ (32 մլն դոլար): RIA Novosti-ի հաղորդմամբ՝ այս մասին հայտարարել է այդ երկրի զբոսաշրջության նախարար Հիշամ Զաազուան:
Զբոսաշրջության նախարարի անունից տարածված հաղորդագրության մեջ նշվում է, որ լրացուցիչ միջոցառումները կներառեն նորագույն սքաներների և մետաղական դետեկտորների գնում, զբոսաշրջիկների պաշտպանության ոլորտում աշխատող անձնակազմի ավելացում, ոստիկանական շների թվի ավելացում, նաև Կարմիր ծովի գլխավոր հանգստավայրերում՝ Շարմ-էլ-Շեյխում և Խուրգադայում, անվտանգության ամբողջական վերահսկողության համակարգի ներդնում:
«Մենք մշտապես ձգտում ենք անվտանգության բարձրագույն մակարդակ ապահովել մեր երկիր այցելել ցանկացող զբոսաշրջիկների համար, դա մեր առաջնահերթ խնդիրն է»,- ասել է նախարարը:
Հունվարի 8-ին դանակներով ու ատրճանակներով զինված 2 տղամարդ ներթափանցել են Խուրգադա քաղաքում գտնվող Bella Vista հյուրանոց: Իրավապահներին հաջողվել է կանգնեցնել և բռնել հարձակվողներին: Փոխհրաձգության հետևանքով հանցագործներից մեկը սպանվել է, երկրորդը՝ վնասվածք ստացել:
Եգիպտոսի ՆԳՆ-ում նշել են, որ վերջին տվյալներով՝ վնասվածքներ է ստացել հյուրանոցի 3 կենվոր, 2-ը՝ Ավստրիայի քաղաքացի և մեկը՝ Շվեդիայի հպատակ:
