Տնտեսական ճգնաժամերը և կառավարության քաղաքական անկայունությունն ընտրողներին ստիպում են ընտրությունների ժամանակ անգիտակցաբար ընտրել ամենաբաց գույնի մաշկ ունեցող քաղաքական գործիչներին: Այս մասին հայտնում են սոցիոլոգները, որոնց հոդվածը հրապարակվել է Journal of Personality and Social Psychology-ում:
«Համակարգի կայուն աշխատանքի ժամանակներում ՝ բաց և մուգ գույնի մաշկ ունեցողները քվեարկում են իրենց խմբերի ներկայացուցիչների օգտին՝ այդպիսով բարելավելով նրանց սոցիալական դրությունը: Բայց մյուս կողմից՝ երբ քաղաքական նավը սկսում է ճոճվել, և՛ սպիտակամորթ, և՛ սևամորթ ընտրողները նախընտրում են պահպանել ստատուս քվոն, ուստի քվեարկում են ամենաբաց գույնի մաշկ ունեցող թեկնածուների օգտին»,- ասում է Չադլի Սթերնը Նյու Յորքի համալսարանից:
Սթերնը և նրա գործընկերներն այդպիսի եզրակացության են եկել փորքի ընթացքում, որի շրջանակներում հոդվածի հեղինակները փորձել են պարզել մի քանի տասնյակ կամավորների քաղաքական նախընտրությունները տարբեր սոցիալական կոնտեքստներում և իրավիճակներում:
Փորձը ցույց է տվել, որ կայունության պայմաններում տարբեր էթնիկ և ռասսայական խմբերի ներկայացուցիչները հակված են եղել քվեարկելու «իրենց» թեկնածուի օգտին՝ բաց գույնի մաշկով կամավորները միշտ ընտրել են սպիտակամորթ թեկնածուին, իսկ աֆրոամերիկացիները և մուլատները՝ սևամորթին:
Ի տարբերություն դրա՝ երբ խոսքը եղել է իշխանության խնդրահարույց և կարևոր մարմնում աշխատանքի մասին, կամավորների կարծիքը փոխվել է՝ փորձի բոլոր մասնակիցները, անկախ իրենց ռասսայից, տնտեսական և սոցիալական դրությունից, ընտրել են սպիտակամորթ թեկնածուին:
