Ուկրաինայի էներգետիկայի և ածխային արդյունաբերության նախարար Յուրի Բոյկոն հայտարարել է, որ «Հարավային հոսք» նախագիծը սպառնում է Ուկրաինայի ազգային անվտանգությանը, ինչի պատճառով անհրաժեշտ է արդիականացնել Ուկրաինայի գազատրանսպորտային համակարգը:
«Իրոք, «Հարավային հոսք» նախագիծը վտանգ է մեր ազգային անվտանգության շահերին, և մենք միշտ դեմ ենք հանդես գալու դրան», ասել է Բոյկոն: Նա տեղեկացրել է, որ ԵՄ էներգետիկայի հարցերով հանձնակատար Գյունտեր Էթինգերը հունիսին ժամանելու է Ուկրաինա, և նրա հետ քննարկվելու են այդ համակարգի արդիականացման հարցերը:
«Որքան շատ մենք արդիականացնենք գազատրանսպորտային համակարգը, այնքան ավելի բաց կլինենք, ցույց կտանք մեր ապահովությունը, և «Հարավային հոսքի» իրականացման քիչ հնարավորություններ կլինեն, որն ուղղված է մեր գազատրանսպորտային համակարգի դեմ, մեր գազային խողովակը դատարկելուն», ասել է նախարարը:
Հիշեցնենք, որ Ռուսաստանը մտադրվել է կառուցել «Հարավային հոսք» գազատարը, որը շրջանցում է Ուկրաինան: Նախագծի վերաբերյալ ուկրաինական կողմը բազմիցս իր դժգոհությունն արտահայտել է:
