ՀՀԿ խմբակցության ղեկավար Վահրամ Բաղդասարյանն «Առաջին լրատվական»-ի հետ զրույցում նշեց, թե ում է իշխող կուսակցությունը դիտարկում որպես ընդդիմություն. «Իշխող կուսակցությունը ներկայացված բոլոր ընդդիմադիր ուժերին համարում է ընդդիմություն: Նրանց, ովքեր իրենց հայտարարել են որպես ընդդիմություն, մենք համարում ենք ընդդիմություն: Թե ինչպիսի ընդդիմություն են այդ հայտարարողները՝ որակական տեսանկյունից, այդ գնահատականը պետք է հանրությունը տա:
Իմ տեսանկյունից՝ բոլոր այն ուժերը, որոնք հայհոյում են, դրանք ընդդիմություն չեն, այլ կարծես թե խռովականներ են, որ խռոված են երկրից, ժողովրդից, և միայն զբաղված են հայհոյանքներով, քննադատություններով՝ առանց դրականը տեսնելու»:
Վահրամ Բաղդասարյանի խոսքով՝ ԲՀԿ-ն, ՕԵԿ-ը և ՀՅԴ-ն ունեն կառուցողական մոտեցումներ, որը շատ հարիր է ընդդիմության կլասիկ ոճին: Նրա կարծիքով՝ ընդդիմությունը և իշխանությունը շատ-շատ հարցերի շուրջ պետք է ունենան ընդհանուր մոտեցում, կարծիք:
«Եթե ուզում եք, որ իշխանությունն իր գործը անաղմուկ կատարի, նրան այդ հայհոյող ընդդիմություններն են պետք, որովհետև նրանք լուրջ հարցի առաջ չեն կանգնեցնում, ծրագրային կարևորագույն քննարկումներից, այն հիմնական բացթողումներից, որ հնարավոր է կատարած լինի իշխանությունը, անմիջապես շեղվում են, գնում են հայհոյանքների դաշտ, սկսվում է զավեշտի վերածվել:
Ավելի դժվար է իշխանության համար աշխատելը և նրան զգոն է պահում, երբ որ նա իր թիկունքին զգում է մասնագիտական, կառուցողական մոտեցմամբ ընդդիմության շնչառությունը»,- նշեց Վ. Բաղդասարյանը:
Անդրադառնալով «Նոր Հայաստան»-ին՝ Վահրամ Բաղդասարյանը նշեց. «Անունը սիրուն է, բայց սիրուն անուններ դնելով չեն կարող ժողովրդին խաբել կամ կերակրել»:
Ընդդիմության դաշտում Վահրամ Բաղդասարյանը դեռևս չի տեսնում իշխանությանը համարժեք քաղաքական ուժ:
Մանրամասները՝ տեսանյութում:
