Հայաստանի ազգային հավաքականի և Դորտմունդի «Բորուսիա»-ի կիսապաշտպան Հենրիխ Մխիթարյանը նշել է, որ ընթացիկ մրցաշրջանում ցուցադրած հզոր խաղով պարտական է թիմի գլխավոր մարզիչ Տոմաս Տուխելին:
Տուխելը Հենրիխին նվիրել է Տիմոտի Գոլվիի գիրքը: Այնտեղ նկարագրված են կատարելագործվելու միջոցներ՝ ինչպես անձնական, այնպես էլ պրոֆեսիոնալ հարթության վրա:
«Նախկինում տանջում էի ինձ, շատ էի մտածում խաղիս մասին: Քննադատում էի ինձ անգամ աննշան թերությունների համար: Իսկ այժմ կարող եմ ծիծաղել բաց թողնված շանսերի վրա: Շատ բան եմ սովորել այդ գրքի շնորհիվ:
Այնպիսի տպավորություն է, ասես այն գրված լիներ հատուկ ինձ համար: Գրքում նկարագրված է ամենն, ինչ ես նախկինում ճիշտ չէի անում: Ես սկսեցի փոխել ինձ և անել այնպես, ինչպես խորհուրդ է տրվում գրքում»,- Kicker-ը մեջբերում է Մխիթարյանի խոսքերը:
Հիշեցնենք, որ ընթացիկ մրցաշրջանում Մխիթարյանը մասնակցել է Բունդեսլիգայի 16 հանդիպումների՝ դառնալով 6 գոլի և գոլային 8 փոխանցումների հեղինակ:
