Ֆրանսիական բանտում կախվել է Մարկ Արմանդոն, որը հայտնի է 1992 թվականին Կենտրոնական բանկի մասնաճյուղի կողոպուտով: Այս մասին հայտնում է Agence France-Presse-ը:
Արմանդոյին մայիսի 3-ի երեկոյան հայտնաբերել են Մարսելի քննչական մեկուսարանի խցում կախված: Դեպքը տեղի է ունեցել Հոլանդիայից արտաքսումից անմիջապես հետո: Հոլանդիայում նրան ձերբակալել էին թմրանյութերի մաքսանենգության կասկածանքով:
Ոստիկանությունը կարծում է, որ դա եղել է ինքնասպանություն: Կալանավորի մահվան փաստով ստուգումներ են անցկացվում:
Քննչական մարմինների կարծիքով՝ Արմանդոն եղել է Ֆրանսիայի պետական բանկի Տուլոնի մասնաճյուղի 1992-ին տեղի ունեցած կողոպուտի կազմակերպիչը: Այդ ժամանակ կողոպտիչները 146 միլիոն ֆրանկ (22 մլն եվրո) էին հափշտակել: Այդ գումարի մեծ մասը այդպես էլ չհաջողվեց հայտնաբերել: Հանցագործությունից անմիջապես հետո, որը ֆրանսիական մամուլը բնութագրեց որպես «դարի կողոպուտ», Արմանդոյին դատապարտեցին 18 տարվա ազատազրկման:
Ապրիլի կեսերին Հոլանդիայի իշխանությունները 56-ամյա Արմանդոյին ձերբակալեցին Ռոտերդամում՝ երկիր կոկաինի խոշոր խմբաքանակ ներմուծելիս: Le Figaro-ի տվյալներով՝ 100 կգ քաշով թմրանյութերի փաթեթը ամրացված է եղել հածանավի ներքևի մասում: Ձերբակալությունից անմիջապես հետո նրան էքստրադիցիայի էին ենթարկել:
