Գերմանիան ներկայացնող հայ բռնցքամարտիկ, մինչև 76,2 կգ քաշային կարգի WBO վարկածով աշխարհի չեմպիոն Արթուր Աբրահամը հայտարարել է, որ բրիտանացի Թայսոն Ֆյուրին արժանի չէր Վլադիմիր Կլիչկոյի նկատմամբ առավելության հասնելուն: Այս մասին Աբրահամը հայտնել է «ՏԱՍՍ» լրատվական գործակալության թղթակցին:
Հիշեցնենք, որ նոյեմբերի 28-ին Թայսոն Ֆյուրին առավելության էր հասել Վլադիմիր Կլիչկոյի նկատմամբ(116:111, 115:112, 115:112):
«Ես ցնցված էի այն փաստից, որ Կլիչկոն պարտվել է, քանի որ բրիտանացին արժանի չէ, որ առավելության հասնի այդպիսի բռնցքամարտիկների նկատմամբ: Կլիչկոն բացարձակ այլ տրամաչափ է: Ակնհայտ է, որ այդ օրը նրա համար վատն ու անհաջող էր, և միայն այդ պատճառով Վլադիմիրը պարտվեց: Սակայն կարծում եմ՝ երբ ռևանշ մենամարտը կայանա, Կլիչկոն հաղթանակի կհասնի: Վլադիմիրը հաշվի կառնի իր սխալները»,- մասնավորապես ասել է Աբրահամը:
