Առաջադեմ առցանց հեռուստատեսային ծառայություն Netflix-ը հասանելի է դարձել գրեթե ողջ աշխարհում, այդ թվում՝ Հայաստանում՝ ասվում է ծառայության կայքում։
Netflix-ն իր համացանցային հեռուստածառայությանն է միացրել ավելի քան 130 նոր երկիր՝ այդպիսով հասանելի դառնալով 190-ից ավելի երկրներում։ Լաս Վեգասում կայացած CES 2016 տեխնոլոգիական ցուցահանդեսի ժամանակ այս մասին հայտարարել է ծառայության համահիմնադիր և գլխավոր գործադիր տնօրեն Ռիդ Հեսթինգսը։
«Այսօր դուք ականատես եք դառնում նոր համաշխարհային առցանց հեռուստացանցի ծննդին»,- ասել է Հեսթինգսը։ «Այս մեկնարկով ողջ աշխարհի սպառողները՝ Սինգապուրից Սանկտ Պետերբուրգ, Սան Ֆրանցիսկոյից Սան Պաուլո, կկարողանան վայելել հեռուստաշոուներն ու ֆիլմերը միաժամանակ՝ այլևս առանց սպասելու։ Համացանցի օգնությամբ մենք սպառողներին ընձեռում ենք հնարավորություն՝ դիտելու երբ, որտեղ և ինչ սարքով ցանկանան»,- ասել է նա։
Netflix-ն արդեն իսկ սպասարկվող 17 լեզուներին ավելացրել է արաբերենը, կորեերենը, չինարենը, թեև ծառայությունը դեռևս անհասանելի է մնում Չինաստանում, ինչի համար ընկերությունը շարունակում է հնարավորություններ փնտրել։ Այն հասանելի չի լինի Ղրիմում, Հյուսիսային Կորեայում և Սիրիայում՝ ամերիկյան կառավարության սահմանափակումների պատճառով։
Netflix-ն իր հոսքային ծառայությունը սկսել է 2007 թվականից։
