Երեքշաբթի երեկոյան համազգային գործադուլը կաթվածահար է արել բելգիական երկաթուղիները: Ամբողջովին դադարեցված է Բրյուսելն ու Փարիզը կապող Thalys ճեպընթաց ուղևորատար գնացքների երթևեկությունը, ինչպես նաև Բրյուսելի և Լոնդոնի միջև Eurostar-ը: Այս մասին հաղորդում է TASS-ը՝ վկայակոչելով բելգիական երկաթուղիների SNCB օպերատոր ընկերությանը:
Նշվում է, որ վերջին գնացքները ուղևորվել են երեքշաբթի օրը՝ ժամը 22:00-ին: Չորեքշաբթի և հինգշաբթի օրերին միջազգային գնացքները փաստացի չեն երթևեկի, ազգային մակարդակով չեղարկվել է երթուղիների երկու երրորդը՝ հիմնականում Վալոնիայի և Բրյուսելի դաշնային շրջաններում:
Արհմիությունները ընկերության ղեկավարությունից պահանջում են ապահովել բոլորի զբաղվածությունը՝ առանց բացառության, ինչպես նաև հրաժարվել աշխատանքի արտադրողականության ու ընկերության վերակառուցման ծրագրերից, որոնք կարող են հանգեցնել աշխատակիցների թվի կրճատման:
