Այս ընտրություններում երկրորդ և երրորդ տեղերին հավակնում են ԲՀԿ-ն և «Բարև Երևան»-ը: Այսօր լրագրողների հետ հանդիպման ժամանակ այս մասին ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը` խոսելով մայիսի 5-ին կայանալիք Երևանի ավագանու ընտրությունների մասին:
Բանախոսի գնահատմամբ՝ արշավն անցավ հանգիստ մթնոլորտում: Նախընտրական քարոզարշավի ընթացքում իշխող կուսակցությունը, նրա խոսքով, ավագանու ընտրությունները ներկայացնում էր ոչ որպես քաղաքական, իսկ ընդդիմադիր կուսակցությունները, բնականաբար, ընտրությունները ներկայացնում էին զուտ որպես քաղաքական:
«Քարոզարշավի առաջին հատվածում նկատելի էր մրցակցություն տարբեր ընդդիմադիր ուժերի միջև, սակայն վերջին օրերին նկատվեց համագործակցություն՝ մասնավորապես ԲՀԿ-ի, ՀԱԿ-ի և ՀՅԴ-ի միջև: Հետաքրքիր էր, որ ԲՀԿ-ն իրեն դրսևորում էր որպես ընդդիմության լիդեր, իշխանություններին հակադրվող միակ լուրջ ուժ:
Շարունակում եմ մտածել, որ վերջին օրերին քարոզարշավին ավելացել է պոպուլիզմ, որով հատկապես առանձնանում էր ՕԵԿ-ը: Իհարկե, ՀՀԿ-ն հաղթելու հնարավորություն ունի, ընտրությունների արդյունքները պարզ են, ֆորս-մաժորներ դժվար է պատկերացնել: Երկրորդ տեղին կարող են հավակնել երկու ուժեր՝ «Բարև Երևան»-ն ու ԲՀԿ-ն»,- մեկնաբանեց Ալեքսանդր Իսկանդարյանը:
Նրա խոսքով՝ ԲՀԿ-ն լուրջ քաղաքական կուսակցություն է, ունի մարդկային և ֆինանսական ռեսուրս, բայց հիմնական էլեկտորատը Երևանում չէ, այլ ՀՀ մարզերում, իսկ Րաֆֆի Հովհաննիսյանն ունի ավելի լավ դիրքեր Երևանում, բայց ռեսուրս չունի, և էլեկտորատ է կորցրել նախագահական ընտրություններից հետո: Նախագահական ընտրություններին որոշակի վարկանիշ կորցրեց նաև ԲՀԿ-ն՝ չմասնակցելով նախագահական ընտրություններին:
