Չիլիացի պոետ Պաբլո Ներուդան իսկապես մահացել է զարգացման վերջին փուլում գտնվող քաղցկեղից: Այս մասին հայտնում է RIA Novosti-ն՝ հղում անելով փորձաքննության առաջին արդյունքներին:
Դատարանի որոշմամբ պոետի աճյունն ապրիլի 8-ին արտաշիրիմվել է՝ պարզելու համար, թե նա բնակա՞ն մահով է մահացել, թե՞ սպանվել է Ավգուստո Պինոչետի բռնատիրության ժամանակ: Վերցված նմուշների մի մասն ուղարկվել է Հյուսիսային Կարոլինայի համալսարանի փորձագետներին, մյուս մասը՝ Տեխասի լաբորատորիա: Փորձաքննություն են անցկացրել նաև Սանտյագոյի դատաբժշկական ծառայության աշխատակիցները:
1971 թվականին գրականության ոլորտում Նոբելյան մրցանակի արժանացած պոետը մահացել է 1973 թվականի սեպտեմբերին՝ ռազմական հեղաշրջումից 12 օր անց: Հեղաշրջմամբ իշխանությունից հեռացվել է նրա ընկերը՝ օրինական ճանապարհով ընտրված նախագահ Սալվադոր Ալիենդեն:
Պոետի վարորդն ու չիլիացի լրագրող Ֆրանսիսկո Մարինը պնդում են, որ Ներուդային սպանել են Պինոչետի կողմնակիցները Մեքսիկա նրա այցի նախօրեին՝ կատարելով մահացու ներարկում:
