Այսօր ՀՀ կառավարությունը հավանություն տվեց Հայաստանի Հանրապետության Կոտայքի մարզի Պռոշյանի գյուղական համայնքի ղեկավարի լիազորությունները վաղաժամկետ դադարեցնելու, համայնքի ղեկավարի արտահերթ ընտրություն նշանակելու, անցկացնելու և ընտրության նախապատրաստման ու անցկացման ծախսերը ֆինանսավորելու մասին նախագծին: Կառավարությունը հիմնավորել է, որ Հայաստանի Հանրապետության Կոտայքի մարզի Պռոշյանի գյուղական համայնքի ղեկավար Հրաչ Մուրադյանը համայնքի ղեկավարի պաշտոնում ընտրվել էր 2012 թվականի սեպտեմբերի 23-ին կայացած համայնքի ղեկավարի ընտրության արդյունքում։ Հրաչ Մուրադյանը 2013 թվականի ապրիլի 2-ին սպանվել էր:
Սեպտեմբերի 23-ի ՏԻՄ ընտրություններում Պռոշյան գյուղում Հրաչ Մուրադյանի մրցակիցը գյուղապետի հանրապետական թեկնածու Արթուր Մուրադյանն էր։ «Առաջին լրատվական»-ը փորձեց պարզել, թե Պռոշյան գյուղում կայանալիք ընտրություններին վերջինս պատրաստվո՞ւմ է առաջադրել իր թեկնածությունը: Նա նշեց, որ նման մտադրություն դեռևս չունի, ոչ էլ մտածում է այդ մասին, և այդ հարցի շուրջ որևէ խոսակցություն չի եղել:
«Միգուցե, կարող ա, կյանք ա՝ շարունակվում ա, բայց դեռ այդ հարցի շուրջ որևէ բան չենք մտածել: Այլ թեկնածուների մասին խոսակցություններ կան, բայց դրանք ռեալ չեն՝ կարծում եմ»,- եզրափակեց իր խոսքն Արթուր Մուրադյանը:
