Ինչպես նախորդ, այնպես էլ գալիք ընտրություններում մասնակցում է սահմանադրական կարգը խախտող քաղաքական ուժ, և գալիք ընտրություններն ի սկզբանե շինծու են: «Առաջին լրատվական»-ի հետ զրույցում նման կարծիք հայտնեց ՀՀ նախագահի նախկին թեկնածու, նախագահական ընտրությունների քարոզարշավի ողջ ընթացքում հացադուլ հայտարարած Անդրիաս Ղուկասյանը։
«Ավագանու ընտրությունները ես ի սկզբանե համարում եմ շինծու, որովհետև այս ընտրություններում առանց որևէ խոչընդոտի մասնակցում են հակասահմանադրական քաղաքական ուժեր, իսկ մյուս քաղաքական ուժերը չեն վիճարկում այդ հանցավոր խմբերի մասնակցության իրավունքը ընտրություններրում։ Նրանք նույնպես մասնակցում են՝ դրանով լեգիտիմացնելով ընտրությունները:
Ես վիճարկել եմ Հանրապետական կուսակցության թեկնածուի մասնակցության իրավունքը նախագահական ընտրություններում և համարում եմ, որ այս ընտրությունները ևս շինծու են և չեն արտահայտում մեր հանրության կամքը:
Ես գտնում եմ, որ ժողովրդավարությունը դա համակարգ չէ, որ դրա միջոցով հակասահմանադրական խմբեր գան իշխանության։ Մեր պետությունն էլ այնպիսի կարևոր դեր ունի, որ չպետք է թույլ տա նման ուժերին մասնակցել ընտրություններին: Մեր պետությունն այսօր գտնվում է կրիմինալ վերահսկողության տակ, խոշոր կուսակցություններն էլ գտնվում են կրիմինալ ուժերի վերահսկողության տակ, ուստի մենք չենք կարող ունենալ ո՛չ իրական ընտրություններ, ո՛չ իսկական ժողովրդավարություն»,- ասաց նա:
Մեր այն հարցին, թե, այդուհանդերձ, կշարունակի՞ սատարել Րաֆֆի Հովհաննիսյանի շարժմանը, կմասնակցի՞ ապագայում տեղի ունեցող հանրահավաքներին, Ա․ Ղուկասյանը պատասխանեց. «Ես չեմ տեսնում դրա անհրաժեշտությունը։ Եթե անհրաժեշտություն տեսնեմ, կմտածեմ այդ հարցի շուրջ. ներկա դրությամբ ո՛չ հրավեր կա, ո՛չ անհրաժեշտություն»:
Դիտարկմանը, թե արդյո՞ք այդ անհրաժեշտությունը վերացավ ապրիլի 9-ից հետո՝ մեր զրուցակիցը պատասխանեց. «Ապրիլի 9-ին ավարտվեց Րաֆֆի Հովհաննիսյանի կողմից ընտրությունների արդյունքների վիճարկման փուլը, և այսուհետ երկրում ստեղծվել է այնպիսի իրավիճակ, որ կամ քաղաքացիները պետք է քաղաքացիական անհնազանդության ճանապարհով փորձեն իրականացնել իշխանափոխութուն, որպեսզի անօրեն ճանապարհով իշխանության եկած խմբերը հեռացվեն պետական մարմիններից, կամ ինչ-որ այլ ճանապարհներով փորձեն քաղաքացիական ակտիվություն ցուցաբերել: Ես քաղաքացիական անհնազանդության կողմնակից եմ և համարում եմ, որ ապրիլի 9-ից հետո քաղաքացիների ինքնակազմակերպումից ավելի շատ բան է կախված, քան քաղաքական կուսակցական լիդերներից, որոնք,ըստ էության, չկարողացան մեր երկրում որևէ բան փոխել ընտրություններին մասնակցելու միջոցով»։