«Պետության կողմից լքվածները» ցուցապաստառով այսօր կառավարության շենքի մոտ բողոքի ակցիա էին կազմակերպել մանկատան նախկին սաները: «Առաջին լրատվական»-ի հետ զրույցում նրանք ասացին, որ այսօր իրենք ապրում են վթարային հանրակացարանային պայմաններում:
«Պահանջում ենք մեր բնակարանները, որոնք դեռ տասը տարի առաջ խոստացել են: 91 թվականից հետո մանկատնից դուրս եկած յուրաքանչյուր սանի հատկացնում են բնակարան, իսկ եթե 91 թվականից մեկ ամիս առաջ են դուրս եկել մանկատնից, չեն տալիս: Մենք մինչև նախագահ դիմել ենք, պատասխանել են՝ ձեզ համար շենք են սարքում, բայց այդ շենքերը սարքեցին և մեզ չտվեցին. արդեն քսան տարի է՝ սպասում ենք»,- ասաց մանկատան նախկին սաներից մեկը:
Նրանց խոսքով՝ հանրակացարանի շենքն ամբողջովին վթարային է. ո՛չ զուգարան կա, ո՛չ կենցաղային նվազագույն պայմաններ:
«Հիմա եկել ենք՝ դիմելու վարչապետին, գնալու ենք, «գրուբի», հայավարի մտնենք մոտը»,- ասաց ակցիայի մասնակիցներից մեկը:
Մանկատան սաներից մեկը մանկատնից դուրս է եկել 89 թվականին, հիմա ապրում է Թբիլիսյան խճուղի 3/2 հասցեում: Հիմա նրան ասում են՝ սովետի ժամանակ եք դուրս եկել, սովետից էլ բնակարան պահանջեք:
Նրանք նշեցին, որ նախորդ տարի հանրակացարան է այցելել վարչապետը, որը ծանոթացել է պայմաններին, ասել, որ հարակից շենքն իրենց համար է կառուցվում, սակայն հիմա ճշտել են, որ շենքը կառուցվել է, բայց ուրիշին են վաճառել:
