Մոսկվայի և Անկարայի հարաբերությունները 2016թ. կսրվեն: korrespondent.net-ի հաղորդմամբ՝ այս մասին ասվում է ամերիկյան Stratfor հետախուզական-վերլուծական ընկերության՝ դեկտեմբերի 28-ին հրապարակված զեկույցում:
Ըստ փորձագետների՝ Թուրքիան կփորձի ուժեղացնել իր ներկայությունն Իրաքի հյուսիսում և, հնարավոր է, ռազմական գործողություն պատրաստի Սիրիայի հյուսիսում: Անկարան մտադիր է ոչ միայն պայքարել ԴԱԻՇ-ի դեմ, այլև զսպել սիրիացի քրդերին՝ ասվում է զեկույցում:
Ըստ փորձագետների՝ Ռուսաստանն ամենաքիչը կուզենար հակամարտություն ունենալ Թուրքիայի հետ, բայց այդ սցենարն անխուսափելի է, քանի որ Անկարան վերահսկում է դեպի Սև և Միջերկրական ծովեր ճանապարհները: Մոսկվան կփորձի խափանել Անկարայի ռազմական ծրագրերը՝ ուժեղացնելով իր ներկայությունը Սիրիայում, այդ թվում՝ երկրի հյուսիսում ավիացիայի ուժերի մեծացման հաշվին:
Սիրիական հակամարտությանը Ռուսաստանի ներգրավվածությունն աճում է, և դա կարող է հանգեցնել նրան, որ Մոսկվան ստիպված լինի չափազանց շատ խնդիրներ լուծել տարածաշրջանում՝ նշվում է զեկույցում: