Ռուսաստանի նախագահ Վլադիմիր Պուտինը փոփոխություններ է մտցրել սահմանափակումներում, որոնք ավելի վաղ ընդունվել էին Թուրքիայի նկատմամբ։ Համապատասխան հայտարարությունը հայտնվել է Կրեմլի կայքում։
Հաղորդագրությունում ասվում է, որ արգելքը կամ սահմանափակումները կազմակերպությունների դեմ, որոնք գտնվում են Թուրքիայի իրավասության տակ կամ ղեկավարվում Թուրքիայի Հանրապետության քաղաքացիների կողմից, սահմանվում են ցուցակով, որը կազմվում է Ռուսաստսանի կառավարության կողմից։
«Թուրքիայի Հանրապետության քաղաքացիների վերահսկողության և (կամ) Թուրքիայի Հանրապետության իրավասության տակ կազմակերպությունների գտնվելու նշանները որոշվում են ՝ համապատասխան «Երկրի պաշտպանության ու պետության անվտանգության ապահովման համար ռազմավարական նշանակություն ունեցող տնտեսվարող սուբյեկտներում օտարերկրյա ներդրումներ իրականացնելու կարգի մասին» օրենքի առաջին և երկրորդ մասերի»,- ասվում է հրամանում։
Ռուսաստանն առաջին անգամ Թուրքիայի հանդեպ սահմանափակումներ է մտցրել նոյեմբերի 28-ին։ Այդ ժամանակ Պուտինն արգելել էր գործատուներին 2016 թվականի հունվարի 1-ից աշխատանքի վերցնել Թուրքիայի քաղաքացիների։ Բացի այդ, նախագահը սահմանափակել էր թուրքական կազմակերպությունների գործունեությունը Ռուսաստանում, արգելել և սահմանափակել էր արտաքին տնտեսական գործարքները, որոնք նախատեսում են Թուրքիայի առանձին տեսակի ապրանքների ներկրում Ռուսաստան։
Այնուհետև կառավարությունը պատրաստել է ապրանքների ցուցակ, որոնք հայտնվել են սահմանափակումների տակ։ Ներկրման արգելքի տակ հայտնվեցին մրգերն ու բանջարեղենը։ Դրանից հետո Կենտրոնական բանկը նախազգուշացրեց, որ սահմանափակումները կարող են Ռուսաստան մթերքի մատակարարումների խափանումների հանգեցնել։