ԱՄՆ-ի գլխավոր շտաբի ղեկավար Մարտին Դեմփսին հայտարարել է, որ եթե Սիրիայի երկնքում ոչ թռիչքային գոտի սահմանվի, դա կլինի բարդ գործընթաց, որը կարող է առաջացնել մի շարք բացասական հետևանքներ։ Այս մասին հաղորդում է The Christian Science Monitor-ը:
Գեներալի խոսքերով՝ Սիրիայի կառավարական ավիացիան տեղի ապստամբների գլխավոր խնդիրը չէ։ Ընդդիմության կորուստների միայն 10 %-ն է կարելի վերագրել ռամզաօդային ուժերի գործողություններին: Այս կապակցությամբ Դեմփսին ենթադրել է, որ սիրիական ավիացիայի դեմ ճնշում գործադրելը հազիվ թե ազդի ցամաքային մարտական գործողությունների վրա:
Գեներալը նշել է, որ այս դեպքում ապստամբներն, ամենայն հավանականությամբ, կխնդրեն հարվածներ հասցնել կառավարական ուժերի ցամաքային մասերին, իսկ դա կնշանակի իսկական պատերազմ Սիրիայի դեմ:
Դեմփսին նաև ասել է, որ այս դեպքում ԱՄՆ-ը պետք է վախենա սիրիացի գործակալների պատասխան հարվածներից՝ նշելով, որ դա վերաբերում է նաև «Հըզբոլլահ»-ին, որը Դամասկոսի գլխավոր դաշնակիցն է տարածաշրջանում:
Դեմփսին ընդգծել է, որ Պենտագոնը սկզբունքորեն կարող է ոչ թռիչքային գոտի սահմանել Սիրիայի երկինքը, սակայն չի կարող երաշխավորել, որ այդ քայլը կհանգեցնի ցանկալի արդյունքների՝ բռնության դադարեցում, քաղաքական գործընթացի սկսում և սիրիական կայուն պետության ստեղծում:
Չնայած այս ամենին՝ Դեմփսին հայտարարել է, որ հրամանի դեպքում չի հապաղի և կսահմանի ոչ թռիչքային գոտի: Նրա խոսքերով՝ այս դեպքում նախապես անհրաժեշտ է կատարել մի քանի պայմաններ՝ շարքից դուրս հանել Սիրիայի ՀՀՊ համակարգը, կազմակերպել օդաչուների որոնողական և փրկարարական աշխատանքներ, պատրաստվել պատասխան հարվածի՝ Սիրիայի կառավարական զորքերի կողմից:
