Սպիտակ տանը տեղի ունեցած պայթյունի և նախագահ Օբամայի վիրավոր լինելու մասին կեղծ թվիթի պատմությունը հանգեցրել է էլեկտրոնային առևտրի իրականացման կանոնները վերանայելու անհրաժեշտության: Այս մասին հայտնում է Reuters գործակալությունը՝ հղում անելով ԱՄՆ-ի ապրանքային ֆյուչերսների առևտրի հանձնաժողովին:
Հիշեցնենք՝ մեկ շաբաթ առաջ սիրիացի հաքերները կոտրել էին Associated Press գործակալության Twitter-ի օգտահաշիվն ու կեղծ տեղեկություն տրամադրել, որի հետևանքով կաթվածահար էր եղել ողջ ամերիկյան բորսային շուկան՝ կրելով վիթխարի կորուստներ:
Անցած տարի վերահսկիչ մարմնի ղեկավարությունն արդեն հանդես է եկել առևտրի կազմակերպչական սխեմայի կոնցեպցիայով, որը կբացառի իրադարձությունների նման զարգացումը, սակայն այն չի ներմուծվել պրակտիկա: «Կարծում եմ՝ ժամանակն է ավարտել աշխատանքը կոնցեպցիայի վրա, որը մենք մշակում ենք արդեն բավականին վաղուց»,- ասել է հանձնաժողովի նախագահ Գերի Գինսլերը:
