Այն, որ ապագայում ԱՄՆ-ը կդառնա էներգետիկայի առումով անկախ և կարող է ինքնուրույն՝ առանց մերձավորարևելյան գործընկերների մասնակցության լուծել վառելիքի պահանջարկի հարցը, միամիտ մոտեցում է: Նման տեսակետ է հնչեցրել Սաուդյան Արաբիայի նավթարդյունաբերության նախարար Ալի Ալ-Նաիմին՝ փոխանցում է France24-ը:
«Ես վստահ եմ, որ Մերձավոր Արևելքից մատակարարումների դադարեցման մասին խոսակցությունները միամիտ են: Չնայած ԱՄՆ-ում արդյունաբերության ծավալների աճին՝ 2012-ի երկրորդ կեսին մերձավորարևելյան հումքի ներկրումը եղել է ավելի շատ, քան երբևէ՝ սկսած 1990 թվականից»,- նկատել է Ալ-Նաիմին:
Նախարարը դրական է գնահատել շելֆում ածխաջրածինների արդյունահանման տեմպերի մեծացմանն ուղղված ամերիկյան վարչակազմի ձգտումը, քանի որ, նրա կարծիքով՝ դա կբարձրացնի էներգառեսուրսների համաշխարհային շուկայի կայունությունը:
«Կոմերցիոն օգտագործման համար կրկին հասանելի նավթի պահուստները փոխակերպում են ԱՄՆ-ի էներգետիկ ոլորտը, և դրանք լավ նորություններ են»,- ասել է նա՝ ելույթ ունենալով ռազմավարական և միջազգային հետազոտությունների վաշինգտոնյան կենտրոնում:- Դա ամերիկյան տնտեսությանը կտա կայունություն և կօգնի աշխատատեղեր ստեղծել դժվարին ժամանակներում»: