ԱՄՆ իշխանությունները թույլ են տվել Կուբայի պետական խորհրդի ու նախարարների խորհրդի նախագահ Ռաուլ Կաստրոյի դստերը՝ Մարիելային, մուտք գործել երկիր: ԱՄՆ-ում նա պետք է ստանա իրավապաշտպան կազմակերպության մրցանակը ու հանդես գա Կուբայում միասեռականության վիճակի մասին զեկույցով: Այս մասին հաղորդում է Fox News Latino հեռուստաալիքը՝ հղում կատարելով ԱՄՆ Պետդեպի աղբյուրին:
Մարիելա Կաստրոն Կուբայի սեքսուալ կրթության ազգային կենտրոնի (Cenesex) տնօրենն է:
Նա ծրագրում է մայիսի 4-ին կայանալիք ակադեմիական համաժողովին ելույթ ունենալ Ֆիլադելֆիայի արվեստի համալսարանում: Բացի այդ՝ Equality Forum հեղինակավոր կազմակերպությունը մտադիր է նրան մրցանակ հանձնել «միասեռականների ու լեսբուհիների շահերի պաշտպանության ակտիվ դիրքորոշման» համար:
Ավելի վաղ հաղորդվում էր, որ ԱՄՆ իշխանությունները մերժել են նրան մուտքի այցագիր տրամադրել, սակայն, ինչպես հեռուստաալիքին հայտնել է աղբյուրը, երեքշաբթի ԱՄՆ իշխանությունները, այնուամենայնիվ, տվել են իրենց համաձայնությունը:
Մարիելա Կաստրո Էսպինը 51 տարեկան է: Նա Սեքսուալ առողջության համաշխարհային ասոցիացիայի (WAS) իսկական անդամ է: Երկու ամիս առաջ ընտրվել է Կուբայի ժողովրդական իշխանության ազգային ասամբլեայի (խորհրդարանի) պատգամավոր: